الحلـــــــــــــــــــم

هل ستموت جافا ؟

2011-05-24T16:48:00.002+02:00

هل ستموت جافا؟ سؤال يتردد بقوة، وهو سؤال تحليلي استنتاجي بحت، حيث لم (ولن) يتم الإعلان رسمياً عن موت جافا من الشركة المالكة "أوراكل". ولكن دة ميمنعش إن السؤال منطقي ومهم. منطقي لأن فيه بعض المؤشرات اللي بتبان إن شكلها كدة، ومهم لأن مهم نعرف المستقبل فيه إيه عشان نحدد على أساسه هنختار كارير إيه وهنشتغل باستخدام ايه. أنا بكتب المقال دة بذهن الـ "حاسوباتي" لا ذهن "صاحب شركة تستثمر في الجافا"، لأن أولاً وأخيراً أنا يهمني الصح لا ما أريده أن يكون صحيحاً، حتى لو جانب العواطف الشخصية كان موجود يوماً ما أيام الحماس في البدايات، إلا أن النهاردة أصبح الأمر واقع ومهنة، المشي عكس الصحيح فيها هيؤدي إلى الفشل والخسارة في النهاية. وفي كل الأحوال، أنا هستعرض وجهتي النظر وهناقش الموضوع بشكل منطقي بحت، وللقاريء التعقيب طبعاً على نهج التفكير والاستنتاج اللي هيوصلني للنتيجة اللي هعرضها.

أولاً: ليه بيقولوا جافا هتموت؟

- بيقولوا جافا لغة صعبة، برغم إن الكتب بتقول عكس كدة. جافا فعلاً أول ما نزلت كانت سهلة وقوية للدرجة اللي خلاها تكسر الدنيا وتستمر لمدة أكثر من 16 سنة، هي اللغة الأولى في العالم. لكن الحقيقة هي إنها لغة ترجع لـ 16 سنة فاتت لا يجب أن تغيب عن الأذهان، برغم إنها طول الـ 16 سنة بتتطور، ولكن بتتطور في نفس المنظور، لغة برمجة كائنية التوجه وستاتيكية النوع (statically typed). أنا لا أنفي إن جافا لغة معاصرة، ولكن فيه لغات معاصرة أكثر اتعملت حديثاً وقدرت إنها تقدم بضاعة تعجب المبرمجين أكتر. بضاعة سهلة ديناميكية بقواعد كتابة أسهل وأقرب لفهم وتصور الإنسان العادي، لدرجة إنها قدرت تزود عدد المبرمجين من المستخدمين العاديين بشكل كبير. والأمثلة كتير على رأسها python و ruby. في نفس الوقت هذه اللغات قادرة على عمل برامج تعمل بكفاءة عالية، وبسرعة أكبر (سرعة في البرمجة يعني).

- غياب الأب الروحي: جيمس جوسلنج أبو الجافا، زيه زي كتير غيره أول ما عرف إن أوراكل اشترت صن سابلهم الشركة ومشى. طبعاً الخلاف واضح وهو إن الأهداف اختلفت. أوراكل اشترت صن (بمنتهى الصراحة) عشان تكسب فلوس ! في حين إن صن كانت بتتعامل مع جافا بالعاطفة أكثر، عاطفة اللي عايز يطور التكنولوجيا عشان دي زي بنتهم اللي مخلفوهاش ! وكانت بتطور بشكل قوي جداً مع صن بناءً على هذه العاطفة وتعاطف الملايين من مبرمجين العالم، لأن زي ما قلنا هي قدرت لحد النهاردة تكون اللغة الاولى في العالم. لكن هدف الأب اختلف مع هدف المالك الجديد، أو اختلفوا في وجهات النظر، سابلهم الشركة وراح اشتغل في جوجل.

- نزاعات أوراكل القضائية: وأشهرها النزاعات الشهيرة بينها وبين جوجل، خناقةً على لوجو جافا واسم جافا وبعض براءات الإختراع في منتجات جوجل. الناس شايفة إن أوراكل بتحاول تموت المنافسين وتقتل الحاجة الحلوة في جافا واللي كانت مدياها الصيت والحب والقوة دي كلها: إنها بتاعتنا كلنا ! الناس شايفة إن أوراكل متوجهة ناحية محاربة الأوبن سورس، ومحاربة من يدعم جافا حتى تحتكرها لنفسها. وحصل هجوم عالمي كبير على أوراكل في مدونات المبرمجين والناشطين في مجال التكنولوجيا، وعليه فإن أوراكل حاولت تدافع عن نفسها وتقول إن هي متقدرش على زعل الجافاويين، و(قللت) شوية من حجم القضايا المرفوعة على جوجل، ونشرت مقال تطمن فيه الناس إنها هتمشي في إتجاه ياخد الجافا لقدام:

http://www.oracle.com/technetwork/articles/java/steveharrisiouc-352581.html?ssSourceSiteId=ocomen

نصدقها أو لا مش دي القضية، أنا شخصياً مبصدقش حاجة غير لما أشوفها بتحصل. ولكن أنا بعرض وجهات النظر بس.

ثانياً: جافا مين اللي هتموت ؟

دة السؤال المهم. الشخص العادي اللي مش عارف جافا بيسأل، جافا هتموت ولا لأ؟ بس ممكن يكون مش فاهم أوي هو بيسأل عن إيه بالضبط. لكن الشخص العارف لازم يكون مستوعب إن السؤال بيتحدث عن شقين ويحتمل قصدين. فهل المقصود بالسؤال هو، تقنية الجافا ككل هتموت، ولا لغة الجافا هي اللي هتموت ؟ والفرق كبير

- تقنية الجافا: هي تقنية تقدم بيئة تشغيل (runtime environments) لـ object-oriented, multi-threaded, distributed applications. ودي بنسميها (كور) الجافا، دي الأساس والأم الحاوية والدادة الخادمة للبرامج. ودي هي الـ Java Virtual Machine اللي بتشغل أي برمجيات مكتوبة بلغة وسيطة تسمى Java Bytecode، وبتقدم لها بيئة عمل قوية جداً. على مدار 16 سنة، جافا اتقدم في عالمها عشرات الآلاف من الأدوات والـ frameworks القوية جداً واللي بتخدم البرمجيات في جميع المجالات من الإبرة للصاروخ. سواء في شغل الـ enterprise systrems أو الـ scientific systems أو الـ games أو الـ graphics أو الـ communications او .. أو... مفيش حاجة في البرمجة متعملهاش framework في جافا، وأنا بقول الكلام دة بمنتهى الثقة ويمكن سؤال جوجل في أي وقت عن أي فريم وورك ممكن تخطر على بالك في جافا. وطول الـ 16سنة بيئة التشغيل دي أثبتت كفاءة في تشغيل برمجيات كبرى شركات ومؤسسات وبنوك ومصارف العالم، للدرجة اللي جعلت أوراكل تسعى بكل الطرق للاستحواذ عليها، ومن المعروف إن أوراكل هي الاولى في العالم في مجال Enterprise Software for Large-Scale Business.

كمان مهم أوي نفرّق بين الـ Java Specification والـ Java Implementation، عشان الصورة تكون واضحة. الـ Java Virtual Machine ما هي إلا عبارة عن Specification عام، كانت شركة صن تقدم له reference implementation شهير وهو الـ Java HotSpot، ولكن دة لا يمنع إن فيه شركات كتير كانت (ولا زالت) بتعمل implementations أخرى لتقنية جافا، مثل GNU و RedHat وعشرات الشركات الأخرى. وأنا شخصياً كنت عملت تجربة صغيرة ناجحة لإني اعمل implementation بسيط "يعمل فحسب" للـ Java Virtual Machine موجود هنا:

http://www.abdallamahmoud.com/2009/12/08/jvm-implementation-with-python-proof-of-concept/

أي حد من حقه إنه يعمل implementation للـ JVM، ولمعظم تقنيات جافا لأن ببساطة، صن حولتها لرخصة GPL...! بمعنى، أوراكل لم تحتكر جافا، ولكنها أشترت صن بالـ reference implementations بتاعتها.

برامج الجافا اللي اتعملت وبتتعمل ولسة هتتعمل، مش شرط تشتغل على جافا بتاعت أوراكل. لو نزلت من على النت جافا بتاعت ريد هات، هتشغل نفس البرامج بردو بنفس الطريقة ! وأوراكل ملهاش حاجة عندك، لأن جافا الأم هي مرخصة برخصة GPL من 2007، ويحق لأي حد إعادة كتابة وتوزيع جافا.

- لغة برمجة جافا: ودي اللغة الستاندرد اللي عملتها صن عشان نكتب برامج للبيئة دي، ونزلت معاها الكومبايلر اللي بيحول الـ Java Programming Language إلى الـ Java Bytecode. اللغة دي أثبتت قوة وسهولة في جميع المجالات، للدرجة اللي جعلتها اللغة الاولى في كتب علوم الحاسب وأمثلة كبار علماء البرمجة في الألجورزمات -بعد لغة السي طبعاً-، بل وحلت محل لغة السي في كتب كتير بتتكلم في مواضيع البرمجة الأساسية زي الـ data structures and algorithms والـ digital image processing وما شابه.

أنا متفق إلى حد ما مع اللي بيقول إن الجافا كلغة برمجة هتموت. ودة طبيعي لأن فيه models كثير في البرمجة أثبتت كفاءة وقدرة أكبر على استخدامها في البرمجة بشكل أسهل وأسرع. ودي الدورة الحقيقية للبرمجة واللي ينكرها يبقى بينكر تاريخ البرمجة، فيه جيل جديد من اللغات كل فترة بييجي ويحل محل القديم. ولكن، هل فيه بيئة هتحل محل جافا؟ أو على الأقل، هل دة باين في الاتجاه العالمي دلوقتي؟

السؤال دة مهم جداً، لأن جافا هي "الأمر الواقع الأكثر كفاءة" اللي يبدو إنه هيوصل لمرحلة أشبه بالـ standard أو الـ mainstream technology لأن الـ standards لا تقدمها شركات ربحية. وبرغم إن أوراكل اشترتها، إلا أن صن قبل ما تسيبها عملت أكبر خير وحماية لحقوق الجافا، وهي بجعلها مفتوحة المصدر كفكرة. أي أن من حق أي حد إنه يعمل implementation, redistrubtion لبرمجيات جافا، وهي الحقيقة اللي قالتها الـ Free Software Foundation في صف Google في نزاعها، ولامتها لإنها مستخدمتش implementation آخر من جافا غير مملوك لأوراكل، زي "الشاي المثلج" IcedTea، نسخة جافا الشهيرة مفتوحة المصدر من شركة ريد هات. حتى بيئة الـ Enterprise، فيه حلول أكثر بساطة منها ومتقدمة جداً ولكن لا زال التوجه هو بناءها على بيئة جافا، مثل spring و More leightweight models from Red Hat وغيرهم.

ولا ننكر على أن خطط كبرى شركات البرمجيات في العالم لا زالت جافا على رءوس قوائمها:

ريد هات سيلون

لغة برمجة جديدة من ريد هات منافسة للغة جافا، ولكن مصممة بغرض إنها تعمل على بيئة جافا.

http://en.wikipedia.org/wiki/Ceylon_Project

جوجل أندرويد

نظام تشغيل الموبايلات الشهير، والذي دخل عالم الموبايلات بقوة. برغم النزاعات القضائية بين أوراكل وجوجل عليها، إلا أن جوجل ترد في القضية ومن حقها وعندها البدائل الكتير، لأن الجافا كتقنية تشغيل برمجيات زي ما اتفقنا مش ملك أوراكل لوحدها. وهذا النظام يعتبر "العملاق القادم" في عالم أنظمة تشغيل الموبايل، ولا زال ذو مستقبل طويل. مكتوب فيه أكثر من 2.1 مليون سطر من جافا، ويقدم بيئة تطوير سهلة جداُ للبرمجيات بالجافا كلغة أساسية، أقامت جوجل ليها المسابقات العالمية.

http://www.android.com/

صحيح إن جوجل بتعمل لغة برمجة جديدة اسمها Go، ولكن لا زالت تستمثر وستثتمر مع جافا في منتجات كثيرة أخرى.

ثالثاً: الاتجاه العالمي في البرمجة

طبعاً الموضوع يلخبط، بس هو بسيط جداً في الحقيقة. الاتجاه العالمي في البرمجة هو: "اعمل لغات جديدة كتير، بس متخترعش العجلة تاني في إنك تعمل runtime platform جديدة". وهو الواضح من التوجهات العالمية الضخمة نحو صناعة لغات برمجة جديدة تستهدف في الأساس runtime platforms موجودة بالفعل وعلى رأسها جافا. طب يعني إيه لغة برمجة تشتغل على بيئة جافا؟

يعني إحنا بنكتب برامج جافا، وبنستخدم نفس إمكانيات و APIs و frameworks جافا، بس بلغة مختلفة بقواعد مختلفة. ممكن نكتب برامج جافا بالبايثون، أو بالروبي، أو بالجروفي، أو بالسكالا، أو بالكثيييييير من لغات البرمجة الموجودة هنا:

http://en.wikipedia.org/wiki/List_of_JVM_languages

الفكرة إن الجافا الحقيقية اللي عليها الخناقة هي الـ Java Virtual Machine مش لغة البرمجة جافا. لغة البرمجة جافا ممكن تتغير بسهولة، عادي نخترع لغة جديدة ونكتب لها كتب جديدة ونعملها كومبايلر جديد مختلف (مش هيكمل حجمه ميجا بايت)، بدون ما نفقد أي نقطة قوة من نقاط قوة جافا سواء في بيئتها أو الـ frameworks المعمولة بالفعل ليها، لأن ببساطة السؤال هو: إيه البديل؟؟؟؟ البديل كبيئة مش كلغة؟؟؟؟ الحقيقة إن جافا هي البيئة الأقوى، واللي عاشت 16 سنة، ولسة هتعيش كتير إن شاء الله. ولا يوجد أي دلائل حالياً على أن التقنية هتموت بالعكس، ولكن كون إن اللغة هتموت ممكن. مش معقول هنفضل لحد ما يكون عندنا 60 سنة بنبرمج بالجافا يعني، بس هي الفكرة هل فيه لغة من اللغات الجديدة حلت محل جافا فعلاً حتى كلغة برمجة؟ فيه لغات قوية جداً وبتستخدم إلى جانب جافا، وأنا كنت عرضت في محاضرة "Express in DSLs" في التوينتي كات إننا نقدر نشغل بايثون مع جافا، ومش بايثون بس اللنك اللي فات فيه ما يورينا إن معظم اللغات الشهيرة تقريباً تم توفيقها للعمل على بيئة جافا. لكن هل فيه برامج حالياً بتعمل في Large-Business Scale مكتوبة بشكل صافي بأحد لغات البرمجة حديثة النشأ؟ لا أعتقد وحتى لو موجود هتكون حالات شاذة، ولا زال البيزنس العالمي يثق في التقنيات ذات التاريخ الطويل اللي أثبت كفاءة مع برمجيات ضخمة زيه من قبل. أنا مش ضد الجديد بالعكس، انا بنادي للتحرر من فكرة الارتباط بلغة برمجة. بس أنا في نفس الوقت لازم أدافع عن القديم اللي هي لغة الجافا الموجودة دلوقتي، لأن فعلاً هي لازالت قوية، ولا زالت الـ static typed languages هي الأكثر أماناً في البرمجة من الأخطاء، ولكن في نفس الوقت أنا بشجع "وبدأت في هذا بالفعل في مشاريعي بالشركة" استخدام لغات أخرى بجانب جافا في المشروع الواحد، وخاصةً فكرة الـ domain-specific languages لما لها من قوة، ولما لجافا من قوة في إنها تخدم هذا المجال. ولا زالت كبرى شركات العالم تدعم الـ java technology specifications، على سبيل المثال لا زالت كبرى شركات العالم تصوت قبل إنتاج برمجيات جافا في الـ JCP، وآخرها التصويت على Java EE 7 في شهر مارس اللي فات (يعني بعد شراء أوراكل لصن)، ودة اللنك:

http://jcp.org/en/jsr/results?id=5162

الشركات المصوتة:

Credit Suisse

Eclipse Foundation, Inc

Ericsson AB

Fujitsu Limited

Google Inc.

Hewlett-Packard

IBM

Intel Corp.

Keil, Werner

Oracle

RedHat

SAP AG

VMWare

وهو دة سر قوة جافا، دعم الشركات الكبيرة ليها، واللي لسة مستمر لحد النهاردة.

رابعاً: على مستوى سوق العمل

دلوقتي ولسنين طويلة قدام، شغل جافا ديفيلوبر موجود ومطلوب وهيظل مطلوب، لأن الجافا كلغة لسة مماتتش. وحتى لو ماتت وهنستخدم لغة برمجة جديدة بتشتغل على تقنية جافا، لا بد إن اللي هيشتغل بيها يكون فاهم تقنية جافا من تحت. زي ما كنا بنقول أساس البرمجة هو السي عشان تعرف تشتغل جافا، فإن أساس البرمجة هيكون جافا عشان نشتغل بلغة أخرى تعمل على بيئة جافا ! دة ميمنعش إن فيه لغات أخرى في السوق زي سي شارب. ولكن لو بنتكلم عن جافا إن الشركات هتطلقها بالتلاتة وإنها هتموت، هيبقى السؤال المهم:

ما هي بيئة التشغيل البديلة، ومن يدعمها؟

الخلاصة

جافا مش هتموت، ومفيش أي حاجة تستدعي إننا نشوفلها موتة قريبة. لغة الجافا ممكن تموت، بل لازم هتموت، أو هتتغير تماماً بحيث تواكب الـ paradigms الجديدة، ممكن يكون قريباً. ولكن البيئة، الـ APIs، الأدوات، الـ frameworks، الـ secifications، والـ core technology ستعيش طويلاً وسيتم الاستثمار فيها كثيراً من كبرى وصغرى شركات العالم. إحنا كحاوسباتيين لما بنتعلم لغة مش بنقول إن هي دي اللغة اللي هنموت واحنا بنبرمج بيها، ولكن بنتعلم لغة عشان نستخدمها في البرمجة الموجودة حالياً، اللي احنا المفروض نكون بنمارسها وبنفهمها بشكل عام. لو اللغة ماتت، نقدر كحاوسباتيين ندخل في أي لغة تانية، وحتى لو مماتتش الحاسوباتي الأصيل يستطيع إنه يتعلم أي لغة برمجة في أيام بسيطة، بل إنه المفروض يكون عارف أكثر من لغة وأكثر من أداة. لكن لا أعتقد إنه قرار حكيم نقول إن الجافا ماتت فنسيبها، ونروح نشوف تكنولوجيا تانية، ما هي إلا في الواقع مجرد لغة أخرى تعمل على بيئة جافا، أو تكنولوجيا حديثة النشء ذكية بالفعل لكن غير عملية في سوق العمل، بل وأحياناً غير موجودة أصلاً !

أتمنى يكون العرض متزن، ومرحبأ بأي تعقيبات أو أسئلة.

جي لابس .. الحلم المبهر

2011-04-29T16:11:00.002+02:00

الرأي العام السائد هو الرأي الخاطيء، والرأي المخالف دائماً ما يصنع الانتقالات النوعية في حياة البشر

مبدأ مقتنع بيه جداً، وممكن أضرب مثل يدعم وجهة نظري. لو كل سواقين العربيات في الشوارع اختاروا إنهم ياخدوا طريق السلام عشان بيكون فاضي الصبح، هيروحوا طريق السلام هيلاقوه أزحم طريق لأنهم كلهم فكروا يروحوا هناك في نفس الوقت ! وبالتالي اللي هيمشي من طريق تاني قد يعتقد إنه مزدحم هيلاقيه فاضي ! الكلام دة اتطبق عندنا في مصر كتير، يعني مثلاً كل الأهالي مقتنعين تماماً إن الدكتور بيكسب كتير، فبيدخلوا ولادهم كلية الطب. ومع ازدياد عدد الأطباء بشكل غير عادي، أصبحت مهنة الطب من أصعب المهن وأطولها طريقاً عشان تقدر ترتزق منها في مصر. مش لازم كلام الناس يكون صح، بالعكس كتير جداً بيكون الرأي العام السائد يسير في اتجاء الخطأ، أو كونه سائداً هو اللي جعله خاطئاً، زي ما ضربت في الأمثلة السابقة. طب إزاي الرأي المخالف هو اللي بيصنع الإنتقالات النوعية ؟ لو فكرت مثلاً في الثورة المصرية، أد إيه كنا كلنا مقتنعين إن لا يمكن ثورة تقوم -وأنا أولهم-، وإزاي مجموعة شباب مصري آمنوا إن المصريين يقدروا يتحدوا بلا قائد، وصنعوا الثورة ببساطة دعوة لحدث على الفيس بوك ! شوف بقى كمية الناس اللي كانت مقتنعة إن الفيس بوك دة ملوش أي أهمية -وخاصةً الأهالي-، بل على العكس كانوا شايفينه هو السبب في الخراب والانحلال الاخلاقي الموجود في المجتمع، وكتير منهم كان نفسهم إن الفيس بوك دة يتقفل خالص ! المجتمع كله آمن بإن الشباب تافه، ليصحوا في يوم خجلين من أنفسهم، لما حسوا إنهم عملوا اللي مقدروش يعملوه هم وأسلافهم ! كل يوم نصحى ونكتشف إن فيه حاجة جديدة، عكس تماماً كل تصوراتنا القديمة !

يوم ما كتبت حاسبات ومعلومات كرغبة أولى في التنسيق، عارضني الكثير سواء أهلي أو أصدقائي أو معارفي، وكنت الشاب "اللي بيحرق مجموعه"، يا عم ادخل هندسة قسم كمبيوتر ! وبالرغم إني مسمعتش قبل كدة عن قسم اسمه "هندسة الكمبيوتر" في كلية الهندسة قبل كدة، بس كنت عارف إن الناس بتقول أي كلام وخلاص ! أكيد هندسة فيها قسم كمبيوتر يعني ! وقتها كنت بنيت اختياري بناءً على بحث طويل على الإنترنت، في مناهج حاسبات المنصورة والقاهرة وعين شمس، وهندسة المنصورة والقاهرة، وكنت مستوعب تماماً إن "حاسبات ومعلومات" هي التخصص الوحيد الذي يدرس كل ما يخص السوفت ويير، وإن تخصصات "هندسة كمبيوتر" اللي بيقولوا عليها هي أغلب للتحكم، اللهم إلا قسم في هندسة القاهرة فقط. المهم إني في النهاية ارتكتب إثم إني أخترت المجال اللي بحبه وكنت بهواه من سنين، أنا عايز أتخصص في البرمجة ! ملهاش نقابة، ملهاش مسمى وظيفي، ملهاش شغل. وات إيفر، أنا بحب المجال دة، وأكيد هو سنة بعد سنة هيتطور أكتر، وأكيد التطور دة هيكون دور الناس اللي هاوياه ! مجال زي مجالنا دة مقامش أبداً بالكليات والدراسة، وإنما قام بمجهودات ذاتية الناس اللي أحبته من زمان، الناس اللي بدأت في العمل في هذا المجال في مصر من أيام الثمانينات، كانت أيامها مجنونة، ولكن هم اللي بدأوا الطريق ووصلونا للوضع اللي إحنا فيه النهاردة، كرابع دولة على مستوى العالم في جذب الاستثمارات في هذا المجال !

حتى بعد لما دخلت الكلية، فيه الكثير عارضني في طرقي وأفكاري. يعني مثلاً جافا إيه يا عم ؟ ملهاش شغل في مصر ! انستركتور مين يا عم ؟ اعمل حاجة مفيدة ! منصورة إيه يا عم ؟ روح اشتغل في القاهرة ! مصر مين يا عم ؟ شوف فلان سافر برة وفي ظرف سنتين بقى ما شاء الله ! بيزنس إيه يا عم ؟ مش كنت أتعينت معيد احسن وتمسك العصاية من النص ! الخ الخ الخ. وبرغم إن دة ممكن يكون ضغط نفسي كبير، لما تحس إن دايماً كل اللي حواليك بيقولوا عنك إنك ماشي في طريق غلط، لأن أكيد هتفكر في كلامهم وتقول مش معقول كل الناس بتتكلم غلط ! إلا إني بجد، أخدت كل خطوة أنا بعملها عن اقتناع تام، ومندمتش على أي قرار اتخذته لحد النهاردة الحمد لله. بل على العكس، كثير من نفس المنتقدين أصبحوا مع الوقت مؤيدين، واقتنعوا بالطريق أو الطريقة لما بيشوف إنها بتنجح، وإنه ممكن ! لكن الخطوات اللي لسة مبنش نجاحها، لا زال الكثير بيعارضوها. زي مثلاً القرار اللولبي المزدوج اللي اتخذته، هو إني لا هسافر برة عشان أشتغل، ولا هروح القاهرة، ولا هشتغل في شركة، وإنما هفتح شركة في سوق ميت من وجهة نظر الجميع اسمه المنصورة، ومش هعتمد على الأوت سورسنج، ولا هعتمد على الكورسات، وإنما هعتمد على الابتكار والتسويق في السوق المحلي ! هذا الحلم المبهر بالنسبة لي، وهو فتح المجال للسوفت ويير المبدع والمبتكر في سوق مصر، والمشاركة في نهضة مصر التكنولوجية، بأبسط وأقل الإمكانيات وعلى هيئة شركة صغيرة تبدأ من الصفر، هذا الحلم أنا مقتنع بيه تماماً ! مش مهم الناس تقول مش هقدر، مش مهم الناس تقول مينفعش، مش مهم الناس تقول كان غيرك أشطر، مش مهم إني هخسر في البداية ودفعتي هتسبقني في السنين الأولى سواء على المستوى المهني أو المادي، مش مهم أنا هنجح ولا مش هنجح، المهم إني هكون حاولت ! المهم إني هكون صادق مع نفسي، ومش هقول كلام عكس اللي بعمله ! أنا بحب مصر، وبحب مجالي، ونفسي أحقق حلمي وأشبع الحبـّ ـبين دول جوايا ! إيه يعني لو خسرت فلوسي أو وقتي أو شبابي، إيه يعني لو اتأخرت شوية، مش هييجي واحد في المليون جنب الناس اللي ضحت بحياتها عشان مصر، وفي نفس الوقت، فيه احتمالية ولو صغيرة جداً، إني ممكن أنجح وأسبق ناس كتير ! أنا مبقولش إني هكون "جوجل" مثلاً، لكن بقول إن قدامي الفرصة إني أكون أحسن منها كمان ! قدامي وقدامك وقدام أي حد في الدنيا نفس الفرصة، إنه يحقق أي مشروع بأي حجم، لأن اللي عمل المشاريع دي، ناس عادية زينا. وفي نفس الوقت، العولمة وصلت لمرحلة إن حتى أدق تفاصيل العلم، أصبحت متاحة للبشرية وبشكل شرعي ومجاني ! أنا متأكد تماماً إني صح لسبب بسيط، وهو إن الشركات الكبيرة هي شركات نادرة جداً. وعليه فإن أصحاب الشركات الكبيرة جداً هم فئة قليلة جداً في المجتمع. وعليه، فإن الفئة الاكبر في المجتمع ترى إن تحقيق مثل هذه الأحلام، صعب لدرجة المستحيل !

"جي لابس" بالنسبة لي هي حلم، الشركة متعددة الفروع حول العالم اللي بتقدم منتجات وخدمات تكنولوجيا المعلومات بشكل مبتكر ومحترف. الشركة اللي ساهمت وبتساهم في تقدم هذا المجال في مصر، وفتح فرص العمل له، ورفع المستوى التقني في المجتمع سواء على مستوى الأفراد أو المؤسسات. وفي نفس الوقت، هي حلم إني أكون غني جداً، ولكن بالعلم اللي ربنا علمهوني. مش بالتجارة المبالغ في أرباحها، ولا بالمضاربة في سوق العقارات والبورصة، ولا بأي وسيلة أخرى خاوية من المضمون. إني أكون غني لأني بفكر، مش لأني فهلوي ! قدد أحقق حلمي، وقد لا أحققه. ولكني فكرت كتير في إني لازم أحاول أحققه، وسأحاول إن شاء الله ! هتنازل عن أي شيء في الدنيا، لكن مش هتنازل عن إني أحقق حلمي دة بطريقة أو بأخرى ! وبنفس المبدأ اللي مؤمن بيه تمام الإيمان، وهو "اعقلها وتوكل على الله" !

أنا شرحت وجهة نظري، لأني عارف إن فيه ناس بتشوف الموضوع دة من أكثر من وجهة نظر. فيه ناس بتشوف مثلاً إني دفنت نفسي في التدريب ودة مش حقيقي، لأنها شركة "أنظمة وخدمات" والأنظمة قبل الخدمات كمان ! وفيه ناس بتشوف مثلاً إني عايز أفتح شركة وخلاص، برغم إني مبعملش أي شو باستخدام اسم الشركة، وماشي في الشوارع أقول أنا بقيت من اصحاب الشركات ! وفي نفس الوقت مش لإني مش قادر مثلاً أشتغل في شركات كبيرة زي بعض الزملاء، فالعروض والحمد لله موجودة من سنين سواء في مصر أو برة مصر، وفي التعاون في مشاريع بأحجام أكبر ! ووات إيفر أياً كانت وجهة نظر الناس فأنا بحترمها فعلاً، بس ستل أنا مؤمن بحلمي وطريقي وهكمل فيه إن شاء الله وسواء نجحت أو فشلت فأنا متحمل كامل المسئولية، ومش هتنازل بسهولة إن شاء الله.

"إن الله لا يضيع أجر من أحسن عملاً"

صدق الله العظيم

أسباب قرار عدم استكمال تنفيذ "جي لابس"...!

2011-04-01T12:02:00.000+02:00

بسم الله الرحمن الرحيم...

برغم من إن مشروع "جي لابس" بدأت التفكير في إنشاؤه منذ أكثر من سنتين، وبرغم إنتظاري لنقطة البداية بلهفة "إنهاء الخدمة العسكرية" عشان أبدأ أنفذّ مشروعي وأفكاري، وبالرغم من الشهور الطويلة من التخطيط وتوثيق الأفكار ودراسة الأجواء العامة، وبالرغم من إني كنت على وشك فعلاً إني أخرّج المشروع للنور في خلال الأيام القادمة، إلا إني قررت قراراً لا رجعة فيه، مش هعمل الـ "جي لابس"...!

كمية كبيرة من المشاعر المتناقضة بتدور جوايا، لكن صدقوني جوة قلبي جرح وحزن كبير... شعور صعب جداً الإحساس بالفشل، وبعدم القدرة حتى على رسم الخطوط البسيطة في حلم كبير كان جوايا... لكن الأسباب اللي خلتني آخد القرار دة كتيرة جداً، مقدرتش أتعايش مع الأسباب دي، أو حتى أتغلب عليها...!

وفيما يلي هعرض بعض الأسباب على سبيل المثال، لا الحصر:

1- الإحباطات الكثيرة من المحيطين... فيه ناس كتير مش مقتنعة بالمشروع، وبتتوقعلي له الفشل... ناس كتير بتنصحني، إنت مش أد الخطوة دي دلوقتي... مش أي حد كدة يفتح شركة...! السوق نايم، مش هتقدر تغطي تكاليفك، من غير شركاء المشروع هيقع... الخ

2- الارتفاع المبالغ فيه في الأسعار... من أول العقارات، والأثاث المكتبي، والداهانات والديكورات، وكل شيء... كل شيء غالي بشكل مبالغ فيه... جشع التجار ربنا يسامحهم أو يسامح الظروف اللي صنعها الفاسدين في العصر البائد...!

3- أحوال السوق... السوق نايم وميشجعش أي حد إنه يشتغل فيه حتى، مش يستثمر فيه... مفيش فلوس في البلد، مفيش حد حتى مقتنع إن فيه سعلة أو خدمة تستاهل ثمنها... الظروف الاقتصادية الصعبة وتشكك العميل من مستوى خدمات الشركات خلق حالة "شبه شلل" في السوق المصري... دة غير إن سياسات السوق غير صحية، من مضاربة ومنافسة واحتكار و"حرق" للسوق... مناخ محبط بجد...!

4- الإحباط الذهني... سنة كاملة من الخدمة العسكرية كنت بعيد فيها تماماً عن كل ما تعلمته ودرسته ومارسته، مش قادر أفتكر حاجة، ولا قادر أرجع أشتغل تاني... حاسس إني رجعت لسة "فريش" مش عارف أي شيء، وكل الخبرة الموجودة في الـ "سي في" كأنها حبر على ورق... ومحتاج وقت طويل تاني عشان بس "أبـــدأ" أرجع لمود الشغل تاني...

أنا حزين فعلاً، ومش عايز حد وعدته بحاجة يزعل مني، أو حد قلتله إني هعمل مشروع يحس إني "عيّل" ورجعت في كلامي... بس للأسف دي الظروف، ودي الحقيقة، وأنا مضطر أقفل ملف الموضوع دة تماماً، وأعلن برغم كل شيء، إنه "لن يكون هناك شيء اسمه جي لابس، لا قريباً ولا بعدين"...!

وفي النهاية، أحب أقول إن النهاردة "واحد إبريل"، وحبيت أشارك في الحدث العظيم المسمى بـ "كذبة إبريــــــل"...! كل سنة وإنتو طيبين :-D

بيان الثورة ضدك

2011-02-24T20:20:00.001+02:00

حبيت حياتي...!

في يوم من الأيام...

كنت بحبك أكتر من نفسي بشوية...

بس أنتي كانت قاسية على نفسي شوية...

وبرغم إني عشت معاكي أسعد لحظات حياتي...

ارتحت أوي لما مشيتي وخرجتي من حياتي...

ولما هجرتي باقي أيامي...

بدأت أحب أكتر أيامي...

بدأت أفكر أكتر في أحلامي...

أصله مبدأ ومش هتنازل عنه...

أصل طموحي مفيش أكبر منه...

أصلي راجل،،،

ومتعودتش إن مبادئي تهزمني...!

متعلمتش إن المادة تحييني...!

تسوقني، تجيبني وتوديني...!

مهما حصل، راجل،،،

طريق اخترته وهكمل فيه...

حلمت بدأته وهغوّط فيه...

كلامِك مكنش مهم...!

كلامكم كله مكنش مهم...!

كلام الناس كلها مكنش مهم...!

كنت بعمل اللي آمنت بيه...

ومع ذلك، كنت بحاول أوّفق...

أرضيكي، وأرضي حلمي...

بس للأسف...

بينك... وبيني... فرق كبير...!

يوم ما حبيت...

حبيت وطني...

أهلي...

حبيت حياتي...

ولما ضاقت بيا...

حبيت أغيّرها...

حبيت أقتل الماضي...

ومكرهتوش...!

يوم ما حبيت...

محبتش مين وكام وفين...

حبيت بلدي...

حبيت أصلح بلدي...

حبيت أشتغل في بلدي...

حبيت أشتغل بعلمي...

حبيت أشتغل اللي بحبه...

حبيت أضحي عشان بلدي...

حبيت أضحي عشان أهلي...

حبيت أضحي عشانك...!

المباديء مبتتجزأش...

والحلم مبيتغيرش...

كنت في يوم مهمش في المجتمع...

أحبك... وموصلش ليكي...

كنت في يوم نكتة المجتمع...

شفت المجنون اللي عايز يفضل فاشل...؟

شفت المجنون، قدامه كتيييير أوي...!

شفت المجنون، اللي مفهمش لغة المجتمع...

الفلوس...!

يسقط العلم...

تسقط المكانة الإجتماعية...

تسقط المباديء والقيم...

ولتحيا لغة المادة...!

مين، وكام، وفين...؟

من زمان كنت لازم أرد عليهم كلهم...

وعليكي بعد ما سمعتي كلامهم كلهم...

وأقولك وأقولهم كلهم...

مين...؟ أنا...!

كام...؟ علمي...!

فين...؟ في بلدي...!

من زمان كنت لازم أثور ضدك...

وإنتي ادتيني الفرصة...

بعد ما سبتيني...!
عشان تصدقيني لما قلتلك من زمان...
إن أنا كنت العاقل...
وكلهم كانوا المجانين...!

شاب في مصر،،،

المؤامـــــــــــرة

2010-11-19T15:52:00.003+02:00

!... قمة التوافق الفكري والتكنولوجي

أنا شاب لا بقول بدهن الهوا دوكو ولّا متكحرط في الدنيا وجايب م الآخر... لا أنا شاب سيس ولا أنا خبيث ولا جيت الدنيا أنا عشان أضرب دبابيس... الدنيا معايا بيس في الجد تلاقيني وبردو في التهييس.. جدع وحبّوب وشايف الدنيا بمبي... وإيه في الدنيا أحلى من إنك تكون شاب، في عز التلج والهوا والبرد فاتح صدر القميص، وبتواجه الدنيا دي كلها بصدرك وكلك أمل وطموح إنك كراجل عصامي تبدأ رحلة حياتك الشيقة من تحقيق الذات والكاشات... تفتكر المُثل العليا اللي سبقتنا من ملايين الشباب اللي بدأوا حياتهم صغار في يوم وهم النهاردة من كبارات الناس في البلد... هم الجيل الكبير اللي موجود النهاردة... كانوا زينا في يوم من الأيام شباب وبتاع وليهم آراء ونظريات جديدة للحياة... وليهم نزواتهم وكبواتهم بردو يعني... بس الغريب إن هو نفس الجيل اللي عمال يتّنك علينا مش عارف على إيه وعايشين لنا فيها في دور المفتّحين اللي كلامهم حِكم لا تقدر بثمن... الجيل اللي شغال كلام لوك لوك عن إن الشباب مبيعملش حاجة، وهو نفس الجيل اللي بيحبط فينا، وبيتآمر علينا مع الظروف اللي حوالينا، عشان يخلينا دايماً في الأرض...! أيوة، الجيل السابق جيل متآمر علينا... جيل أبويا وأمك وستي وسيدك...!

أبسط حاجة... تلاقي نفسك بتحب كارير أوي، ونفسك ومُنى عينك تشتغل فيه... تلاقي نفسك عايز تختار الكلية اللي تناسبك... بابا، عايز أدخل إعلام... يا بني، لا أنا نفسي طول عمري أقول إن ابني مهندس... يا ماما بس متعيطيش، خلاص أنا هرضيكي...! تبص تلاقي نفسك في هندسة، كلية لا إنت بتحبها ولا طايقها، والأمور مرسومة قدامك في صورة رضا الوالدين من رضا الله... هو يرضي ربنا إننا نفضل شعب متخلف مبنخترش المجال اللي بنحبه وشايفين إننا هنقدر نتفوق وننتج فيه...؟ سبحان الله، تلاقي أبوك دة يا أخي ماسك جورنال معارضة بعدها مفيش بيوم، عمال يقرا في مصايب البلد ويقول لأمك اللي قاعده جنبه (ترول) المحشي: شفتي يا أم العيال البلد دي معدتش نافعة ومفهاش شغل... آه والنبي يا أبو العيال، دة أنا كل ولاد صاحباتي اتخرجوا من هندسة وقاعدين في بيوتهم... يا أختي ما هي المهندسين بقوا على قفا من يشيل... يا أخويا بس نفسي أقول ابني الباشمهندس... إن شاء الله يا بو العيال ربنا هيفتحها في وشه...! إدعي له للصبح يا أم العيال...!

تيجي تدخل الكلية، وتبدأ تشوف الدنيا بصورة تانية... بنااااااااات في كل حتة يا خوانا... وأنا ماشي داخل المحاضرة، وأنا واقف قدام باب السكشن، وأنا ماشي جنب الكافتيريا، في السنتر، ورا المدرجات، بين الشجر، حتى وأنا قاعد ورا كلية حاسبات أضرب بانجو...! آه يا قلبي، دول عساسيل خالص... وفيهم شوية مُزز يا جدع، يحلّوا من على حبل المشنقة... أوبا، ولا، البت دي وتكة... صاروخ يا جدعان هتهبل عليها... لا دة أنا لازم بقى أبدأ أفوق لنفسي، وأروح الجيم وأضرب الحتة البودي على جتتي، وأقلب أبويا في فلوس الكتب وأجيب حتة Ray Ban لزوم المنظرة... أضرب بقى العلبة الأحمر في إيدي مع الموبايل التاتش، عشان أشوف نفسي في المراية الشاب الجنتل الهاي، اللي البنات تشوفه تقول عليه وااااو... أمشي في الجامعة حاسس إن كل البنات بتبصلي وبتقول عليا واااااااااو... مش عارف ليه كل ما أبويا يشوفني داخل البيت بالمنظر دة يضحك ويقولي والله يا بني بتفكرني بنفسي وأنا قدك، إنت بالمنظر دة عمرك ما هتفلح...! (تفتكر عشان كدة مفلحتش يابا...؟)

البنات يا خوانا، خلاص مبدهاش بقى هأنتم مع جيجي... والله البت مؤدبة وزي العسل وفيه بينا كيميا، أنا بحبها وهي بتحبني وشايفين الدنيا وردي... أبويا عرف، بس نازل تريقة عليا وبيكسر في مجاديفي... أمها عرفت، وعمالة تديها نصايح الأم الصديقة لبنتها في إن العلاقة بينهم تبقى في المعقول، لحد ما اتقدم... تمر السنين وييجي اليوم اللي بحلم بيه، يوم حفلة التخرج... روحت بيتنا وقلت لأبويا: بابا، أنا عايز أتقدم لجيجي... يا بني انت لسة صغير شوف مستقبلك الأول مش عارف إيه... يا بابا، هو إنت مش قلتلي إنك كنت واخد أمي عن حب، وكانت زميلتك في الجامعة... وبدأتوا حياتكم سوا...؟ أيوة يا بني، بس الزمن غير الزمن والناس غير الناس... ليه يعني يا حاج، مش كنت لسة شاب جربان بتقبض عشرين جنيه و4 مليم، بتدفع منهم عشرة جنيه إيجار شقة، و 4 مليم سجاير، و 10 جنيه أكل وشرب ومواصلات...؟ أيوة يا بني، بس دلوقتي الوضع بردو يختلف... يختلف مين يا عم بالـ 4 مليم بتوعك دول، دة أنا بكرة هشتغل في شركة وأأجر شقة ع الواجهة وأجيب أحسنها عربية، هو أنا قليل ولا إيه...؟ عموماً يا بني، أنا هاجي معاك أنا وأمك...!

والله أمها ما قصرت ونزلت بالجاتوه والشربات... بس أبوها الله يهده بعد ما إداني محاضرة عن إنهم بيشتروا راجل، وإنه كان واخد مراته (هو كمان) عن حب وكان شاب باديء حياته... وبعد ما خلص خطبته عن إن له ابن زيك، ومقدر ظروف الشباب وإنهم مش بتوع جيب وهات ونفسك تتفتح ورجلك تتزنق... أبص ألاقي اللطخ نازل عليا طلبات ومواصفات خيالية لحاجات خيالية مسمعتش عنها قبل كدة في جواز الناس بالمقاييس العالمية: شقة تمليك...؟ يا نهار أسود... وظيفة ثابتة...؟ عايزني أبقى شحات وأشحت منك أكل بنتك...؟ نيش 4 طقم جاتوه ذو فتحات للباتون ساليه...؟ دة عملوه امتى دة...؟ جرام الدهب بقى بـ 200 جنيه...؟ الدهب غلى فعايز أجيب ألماظ...؟ يا حبييييب عين أمك... ليه هيفاء وهبي...؟ بنتك مبتركبش مواصلات...؟ الله يرحم أيام ما كان أبوك بياخدك قدامه ع العجلة...!

فضتها سيرة أم دي جوازة... الظاهر يا دادي كان معاك حق أشوف مستقبلي بقى... كل الشركات عايزة خبرة 3 سنين... يا دي النيلة أنا لسة شاب فريش يا جدعان... قشطة، لقيت شركة بتتصل بيا عايزة فريش... خدت البدلة من ع الحبل ورحت الإنترفيو... ناس طيبين أوي ومحترمين أوي ونضاف أوي... الدنيا هتحلو أهي... أحييييه، بقى بعد 5 سنين كحرطة في الجامعة وكورسات بكام ألف، تقولي هتقبض 700 جنيه...؟ مقبلتش الإهانة، وروحت بيتنا وصرفت نظر عن الشركة... أبويا قعد يزن على وداني ويقولي بدل ما إنت قاعد صايع، روح اشبط في أي شغلانة... يا بابا هو ميكروباص...؟ مش ممكن أقبل بالمبلغ دة دي إهانة ليا... يا بني انتو جيل مببتحمدوش ربنا...؟ أنا لما كنت أدك كنت باخد 20 جنيه و4 مليم (أم الـ 4 مليم بتوعك دول يا جدع) وكنت ببوس إيدي وش وضهر... يا بابا بالمنظر دة الشركات دي هتقدر تفرض أسعارها ورواتبها علينا، لازم يا بابا يكون لينا موقف... لازم يا بابا نقول لواقعنا لأ...!

لأ... إنت هتروح وهتشتغل أنا خلاص تعبت من مصاريفك...! أعمل إيه بقى...؟ اضطريت إني أقبل إني أشتغل 10 ساعات يومياً متواصل بـ 700 جنيه بس ويا ريت عاجب... يا ريت عاجب البيت ولا عاجب الشركة ولا عاجب المجتمع... فيها إيه لو الناس تسيبني في حالي أختار الطريق اللي بحبه وأمشي فيه بدماغي من غير ما حد يستعجلني ويضغط عليا، ويتدخل في حياتي...؟ فيها إيه لو أبويا وأمي يفهموني وحمايا وحماتي يقدروني والمجتمع يقدرني ويبصلي بحب واحترام... أنا الشاب اللي باديء حياته، بأمل... أرجوكم، إفهموني وكفاية مؤامرة الإحباط دي...!!

عبد الله محمود للتدريب المهني على صناعة البرمجيات

2010-11-18T15:52:00.003+02:00

!... الحاج لِفتة بتاع الكُفتة

الاسم اللي شغلي بالي، وسهرني ليالي، وتعبلي حالي، طول سنتين بفكر في الفكرة ومش لاقيلها اسم مناسب يعبر عنها. يمكن الموضوع صعب، لأن الفكرة مختلفة شوية عن المألوف، أو ممكن لإن الفكرة أصغر وأقل بكتير جداً من الموجود فعلاً. وممكن يكون الإسم اللي اخترته دة مُكرر ومبتذل على غرار الحاج لِفتة بتاع الكُفتة، بس مفهوش غلط لأن فعلاً الموضوع كله إن الحاج لِفتة فاتح دكانة عشان يعمل كُفتة ويبيعها ! الإسم ريح بالي لأني مش هضحك على حد وأقوله أنا بقيت بيزنس مان خطير وفتحت شررررررركة مرة واحدة وبقيت من أصحاب الشركات في مصر، زيي زي أحمد عز بالظبط يفرق إيه عني ! ولا فتحت مرررررررركز للتدريب فيه تيم من المحترفين وفاتح بيوت انستركتورز كتير واختفائي من الحياة هييجي ع الناس بخراب بيوت، زي هشام طلعت مصطفى ! هي أوضة وصالة، بس أعمل فيهم اللي أنا عايزه ! دي كل الفكرة، ودة أدنى المطلوب، باختصار !

لو دايماً مش راضي عن أداء الشركات والأدوات والنَهج اللي بتمارس بيه عملية التدريب مع المتدرب في مصر، وحاسس إن عندي (حاجة مختلفة) ممكن تكون ليها (نتايج مختلفة)، ومدون أفكاري دي كلها في قصاصات من الورق (اللي بدور عليه لحد دلوقتي)، وعامل فيها عم المصلح الاجتماعي ! بلاش أكون بؤ بقى وأجرب كدة وأشوف ! يمكن أكون على حق، وممكن أكون واهم، وممكن أكون على حق بس محتاج شوية تعديلات في أفكاري عشان أوصل للطريق الصح، كل شيء ممكن. بس اللي مش ممكن أبداً، إني أتنازل عن إني أطبق فكرتي وأدافع عنها وأفضل وراها، لحد ما أثبت للناس إني كنت بفكر صح، وأقنعهم بقناعتي وأثبت وجودي. وأول مبدأ رسيته للعمل هو "العمل آخر أهدافه جمع المال" ! أصل ممكن يكون "السفر أحسن طريقة لجمع المال"، ونرجع بقى نتجوز ونشوف حياتنا بقى وبتاع. بس أصل الفلوس بتتصرف وبتروح وبتيجي، والجواز أهو كل الناس بتتجوز وبتطلق، بس الفكرة الحلوة هي اللي بتعيش وبتصمد، وبتبقى للإنسان مهنياً ومادياً. ومين فينا مبيحلمش بجزيرة يكون رئيسها ويعمل فيها ما بدا له. ولما تجيله زيارة من الأمم المتحدة يشاور بصباعه بتناكة ويقول "الجزيرة دي أنا اللي بانيها بعرقي" ! العربية اللي جايبهالي بابي مشكوراً بصراحة ملهاش طعم، والعربية اللي هتسلمهاني الشركة مشكورة بصراحة طعمها مُر، بس التك التك اللي هجيبه بشوية كهربا بتمر في مخي هيبقى في عيني بي إم !

الفكرة بتاكل دماغي ومشعشعة في نفوخي، الفكرة اللي رسمتها وضيعت في تخيلها ساعات طويلة من أعز أيام حياتي. الفكرة اللي بدّعي إنها مختلفة وهيكون ليها نتايج مختلفة. الفكرة اللي مبحبش أتكلم فيها عشان مبحبش أتكلم عن حاجة مش موجودة وهعملها لما أكبر زي العيال الصغيرة. الفكرة اللي سخر منها البعض واتشأتأ قدامها البعض وموثقش البعض فيها. الفكرة اللي شجعني عليها من شجعني، وحاول يحبطني من حاول. الفكرة أنا خلاص رسمتها توكلت على الله وخدت قرار إني أنفذها، وتكون هي العودة المهنية القادمة بالنسبة لي إن شاء الله.

ادعو لي شكراًَ. :)

هاي كلاس يا إكسلانس...؟

2010-11-02T20:09:00.001+02:00

بذمتك مش إحنا جامدين اوي...؟

أوووووووووووو يااااااااااي، نو شيت...! إيه القرف دة...؟ ناس خنيقة صحيح... أو نو، القميص مش ماشي خالص ع البدلة...! ماي جااااااد، لون البوت مش ماشي مع قماشة الجينز...! تاكسي حيوان صحيح... مش شايفني شاب (هاي كلاس) ولا إيه...؟ اتفو، وكمان بتطرطش عليا مياه يا جعّر يا حمار...؟

احم... لازم أزبط لساني بقى... أصل معلش بالصلة ع النبي، أنا الشاب الجنتل الهاي كلاس أوىىىى... دادي فلوسه مش مكفياني في فيزا واحدة، فشايلهم في فيزتين... واحدة باسم مامي، وواحدة باسم حضرتي... أنا اللي فضلت طول عمري مقضيها في الثانوي ومش في دماغي الدنيا، أتنك على خلق الله، لحد ما جبت مجموع زفت، ودخلت الأكاديمية الدولية المتحدة في الكمبيوتر ساينس... بعد ما بابي دفعلي المصاريف، اشترالي عربية فور باي فور احتفالاً بيا وبشطارتي... أنا اللي مصاحب أحلى مزتين فيكي يا أكاديمية، ومشبرقهم بالفيزا اللي باسم مامي... قضيتها كورسات وبيرة وبلاي ستيشن، لحد ما خلصت الأكاديمية بتقدير امتياز... بابي احتفل بيا، وفتحلي محل لاب توب في أكبر شارع فيكي يا بلد... أنا اللي شايفني أرقى وأحسن دايماً من اللي حواليا... أنا اللي بلبس الطقم البراند والكوتشي البراند والنضارة البراند والساعة البراند والبيرفيوم البراند، وتقل الدم براند بردو...! أنا اللي أي بنت فيكي يا بلد تبص عليا، أووووووووو يااااااااااااااي...!

مش عارفني يا أخوانا...؟ أنا الشاب اللي عايش الدور، ومفكر نفسي أحسن من كل اللي حواليا... أنا التنك اللي معندوش أي حاجة في الدنيا غير فلوس أبوه... أنا اللي أي بنت عبيطة وهبلة تتمناني... ليه...؟ عشان راجل...! صحيح مبشتغلش، ولا فالح في دراستي، ولا ليا أي كيان... بس حاسب، أوعى يا مان... الحاج ربنا يخلهولي، مش حارمنا من أي حاجة، عشان يفضل يتباهى بيا قدام كل الناس...! أنا اللي لساني دايماً مسحوب مني، يا بني عيب أبويا معارفه كتير...! قشطة هوب الواوا... شعاري دايماً في الحياة...

مشكلتي في الحياة جيجي... بنت زي القمر، بس دايماً تقولي يا تافه...! وصل بيا الحال إني جبتلها خاتم ألماظ هدية، وبردو رافضاني وصاداني... صحيح مش عارف إن كنت بحبها ولا لأ، بس دايماً تقولي كلام خنيق وبيئة... دايماً الجربوعة تقولي إني بيئة، معدش إلا جيجي صحيح أم حجاب... اللي أبوها عايش في شقة أوضتين وصالة... اللي تقول عليا إني زبالة المجتمع... أنا...؟ أنا ولا حاجة...؟ قال فارس أحلام باديء من الصفر قال... قال إيه، مش راجل...!

اتفو... طبقة واطية صحيح...! احم، أقصد أوووو يااااي، ناس لوكال صحيح...!

عــــــــــــريس يا بــــــــــــــوي

2010-10-29T04:33:00.003+02:00

خطبت وببص للمراية... لقيت نفسي كدة...!

المشهد الأول: عريس يا بووووووي

"عريس يا بووووووي"

"واه... خبر إيه يا بنتي... اتلحلحي جولي..."

"جالي عريس يابا... بس بحبه جوي وعايزاه يابا..."

"ودة عرفتيه منين يا بت...؟ انطجي... جري واعترفي بدل ما سم بدنك"

"يوه يابا... كان زميلي في الدي إس إل... وكنا دايماً بنتجابل واحنا بندفع الاشتراك في تي إي دي تاِ..."

"اه يا بت الصايعة... طالعة لأمك يا به... اتعرفت عليها ع الجوجر سيرش..."

"يا بوي يا حبيبي الأوان غير الأوان... حدانا احنا الشباب افكار متطورة ومتنورة... فاهمني يابا...؟"

"اجطع دراعي ان كنت فاهم حرف... سكي حنكك يا أم لسان عايز جطعه من لغلوغه... جتكو البلي... جيل عايز الحرج..."

"ليه بس يابا...؟"

"حالكم ميسرش عدو ولا حبيب... كل يوم تجوليلي يا با هات مصاريف الفادافول... يابا عايزة اجيب علبة كيك أب... يابا عايزة أجيب دبدوب احضنه وانا بنعّس... فينك يابا شوف المسخرة اللي بجت فيها بنت ابنك..."

"يا بوي متجولش إكدي... وبعدين الارتباط يابا مش عيب طالما في النور والناس كلتها في الساحة عارفة... وبعدين الراجل جاي يدخل الدوار من بابه وجايب عيلته كلتها معاه في ريحه... قابله يابا واتكلم معاه دة هيعجبك جوي..."

"ودة يطلع مين الجدع ده...؟"

"دة عوضين ابن تيزة أم عوضين... معاه معهد لاسلكي وشغال في النظم الخميرة والذكاء الصناعي عدم اللا مؤاخذة يعني يا بوي..."

"واه... عوضين الواد الهفتان دة...؟ دة يا بنتي محيلتوش اللضة..."

"بس واد عصامي يابا... تصور يابا يبقى قاعد في الدوار... ويقدر يأكسس أي جهاز في أي أوضة..."

"يا نهار طيييين... إوعي يا بت يكون بيقدر يأكسس إكدي ولا إكدي...؟"

"لا يابا متخفش... أنا واخدة كورس سيلف سيكروريتي عند خالة أم بهانة..."

"تربية أبوكي يا بت... يالا على بركة الله..."

"يعني أجيبه يابا...؟"

"هاتيه يا بت..."

المشهد الثاني: عوضين في الدوار

"حداكم كام دوار يا باشمهندس...؟"

"إحم... الحقيقة يا أونكل إحنا عندنا شقة عايش فيها مع دادي ومامي... بس مقدم على شقة بالتقسيط مع بنك استثماري... وإن شاء الله يا أونكل هكون جاهز بعد سنتين..."

"واه... يعني محداكش دوار مجهز بالتكنولوجيي الحديثة واللاب توبس والشاكوزي...؟"

"المستقبل قدامنا يا عمي..."

"بالنسبة بقي للشبكة... هتجيبها (لاتزغد) ولا أزغدك من جدامي...؟"

"واحدة واحدة يا أونكل أنا لسة بكون نفسي..."

"بتإيه يا وِلد...؟ بتكون نفسك...؟ طب كوم نفسك من هنا يا أفندي والباب يفوت بهيمة زيك..."

"إيه يا أونكل...؟"

"برة يا حبة عين أونكل في أوراكك...!"

"ياااااابا"

"اخرسي يا بت... جلتلك هجيبلك عريس من مجامنا... جبتيلي الهلفوت دة... الجوازة دي مش هتم غير على جثتي..."

"من غير ما تجول يابا... أنا كمان مش رايداه..."

"مالك يا بيبي...؟"

"سك حنكك يا عوضين... اللي بينا مات واندفن... احنا ملناش جسمة ونصيب في بعض..."

"بيبي...؟"

"وكمان بتجولي مساء الخير...؟ الوداع يا عوضين..."

"معلهش يا بنتي... وحياة شنبي لجيبلك سيد سيده..."

المشهد الثالث: سيد سيده

"يا ميت أهلاً وميت مرحب باسماعين ابن الحاج ابو شقفة... أكبر تاجر بهايم فيكي يا ميت الغُلسة... يا دي النور يا دي النور..."

"بص يا خال... أنا راجل دوغري... المهر ميت بهيمة، واتنين برميل (جِلة) لزوم التسميد... وأنا عايز بنتك..."

"موافقة يا بنتي...؟"

"متكسفنيش بجا يابا...!"

"الفاتحِة..."

"لولولولولولولولولولوي...!"

سؤال الحلقة

مين هو البــــــــهيم من شخصيات الحدوتة دي...؟

مكتـــــــــبي

2010-10-28T04:51:00.007+02:00

!آدي المكتب وجبناه... أعمل بيه إيه بقى دلوقتي...؟

طول عمري أحب قعدة المكاتب أنا... فاكر وأنا صغير أول ما دادي ومامي قرروا يجيبولي مكتب (مكتبي الحالي)، عشان -قال إيه- أذاكر عليه، إني كنت فرحان أوي وحاسس إني بقيت شخص مهم في المجتمع، برغم إني كنت لسة في تالتة إبتدائي ولاّحاجة...! دايماً بتخيل نفسي العبقري الصغير قاعد على المكتب وقدامي كتب ومراجع مفتوحة، وعمال أحل في معادلات وأعمل في تصميمات، وأخترع حاجات محصلتش ولا هتحصل، ومش هتحصل طبعاً...! لمجرد إني خلاص بقى عندي هذا الصندوق السحري، المسمى بالمكـــــــــــــتب...!

الشيء الأكيد إن كل واحد فينا جواه قلب عاشق للمكاتب.... وإن دايماً الإنسان بيحس بقيمته أعلى وهو قاعد على مكتب... وتزداد علوّ القيمة المعنوية الداخلية للذات طردياً مع فخامة المكتب، وشياكته، وكمية الأدوات الأساسية والتقنيات الحديثة المستخدمة في إنجاز الأعمال اليومية، اللي أكيد هامة، طالما كل الهيلمان دة معمول حوالين المكتب...!

ومع ذلك، الشكوى الشهيرة في لسان الناس، هي إن قعدة المكتب تزهّق... وبرغم إن دة حقيقي، بس البعد عن قعدة المكاتب يشوّق... يشوّق الإنسان إنه يرجع من تاني ويقعد على مكتب، والناس تعوزه وتجيله ويتكلموا معاه، وينجزلهم أعمالهم... عمال ترد من تليفون لتليفون وعمال تزعق للسكرتيرة عشان ممضتش الصرفية المليونية الشهرية للموّرد الأجنبي اللي بتتعامل معاه في المشروع الثلاثي بينك وبين الحكومة والقطاع الخاص...! سواء كان الإنسان دكتور، أو مهندس، أو مدرس، أو تاجر، أو رجل أعمال، أو حتى لاعب كرة، فالإنسان دايماً جواه الرغبة إنه يمارس المهنة، بكل متطلباتها، ولكن في نفس الوقت يكون عنده مكتب مستقل، عليه اسمه، وتحتيه المنصب التاريخي: "رئيس مجلس الإدارة"...!

لو إن مكتبي (الحالي، اللي أنا قاعد من عليه دلوقتي قدام الجهاز فاتح البلوج وبكتب البوست دة) هو عروستي الموزّة الأمورة، اللي بحس بكل حاجة حلوة في الدنيا وأنا معاها، وبتمنى إن كل الناس يشوفوني دايماًمعاها، وتكون دايماً مرتبطة ومنتمية لإسمي... فالعروسة دي محتاجة شقة، عشان احم، ناخد راحتنا مع بعض...! أهو بالضبط كدة، أنا لو أخدت مكتبي دة واخدتله شقة، بقى عندي مكتب من اللي بحلم بيه...! كدة هو..؟ آه، كدة هو.. بأبسط الإمكانيات...!

المكتب، اللي همارس عليه وحواليه مهنتي، هو الذات اللي بدور عليها عشان أحققها... إن يكون عندي مكتب خاص، ومستقل، وحر... أمارس عليه فكراً خاصا، ومستقلاً، وحراً... إن يكون عندي فريق العمل بتاعي... إني أكون القائد، والمدير، والمنفذ... إني لا أكون مجرد فرد في مؤسسة، سواء كانت شركة، أو جامعة، أو حتى مدينة فضاء...! وإن المكتب دة يكون في مكان مستقل، تحت أي مسمى... مكتب، شركة، مؤسسة، منظمة، جمعية، أو حتى شباك تذاكر مترو خاص...! إني أكون الفرد المالك والمدير للمؤسسة، لا جزء منها... أطبق فكري، وأستمتع بمشاهدة النتائج، وجني ثمار عملي...!

ولأني الحمد لله شاب طموح، وعندي الجرأة إني أخوض التجربة، وأنا لسة في سن صغيرة... فأنا –بعد التوكل على الله سبحانه وتعالى- قررت إني أكوّن "المكتب" اللي همارس فيه أعمالي، أول ما أنتهي من فترة التجنيد إن شاء الله... يسموه مكتب، يسموه شركة، يسموه حتى سايبر، مش مهم... المهم إنه بتاعي، وإن مكتب المدير، بتاعي... مش مهم يكون صغير، الصغير بيكبر طول ما عنده أمل وإقبال على الحياة وروح المغامرة والإصرار... وكدة وكدة أنا لسة صغير، سواء سناً أو مهنياً... ومش ورايا حاجة غير إني أفضل أتغذى كويس عشان أكبر...!

ولو حد سألني السؤال المشهور: إيه أول حاجة هتقولها أول ما تقعد على المكتب...؟ فأنا هرد وأقول بكل تناكة: "من موقعي هذا أعلن لكم، وداعاً للعمل لحساب الآخرين"...!

لوف ستوري

2010-10-21T23:12:00.003+02:00

"يا سلام ع الدنيا، وحلاوتها، في عين العشاااااق..."

الله عليكي يا أم كلثوم... هييييييييه فين أيام الحب بتاع زمان... لما كان الواحد مننا يقعد يستنى حبيبته بالساعات عشان تطل من "شيش" البالكونة، تسقي الزرع، وهي لابسة "جلابية" البيت المزركشة، وعينيك "هتبظ" على دراعتها، وتبقى "حيحان" على نظرة منها، وتخاف تفقعك "ابتسامة" حلوة توقعك متحطش منطق...! كانت أيام جميلة يا خوانا... مش النهاردة... البنات عمالة تتلزق للواحد، وتبص في وشك فاتحة بؤها في ضحكة عبيطة، مش عارف ليه... وكمان خلاص، زمن التلاكيك عشان تروح تكلم البت من دول خلص... القديم كيييك هو بس اللي ممكن يروح ياخد كشكول البت عشان يكلمها... النهاردة إنت تقدر تروح لأي بنت تعجبك، وبمنتهى الشياكة والأناقة تقولها: ما تيجي ناخدلنا لفتين في العربية...؟ وعلى حسب نوع عربيتك بقى ومستوى البنت، يتحدد إذا كانت هتركب معاك ولا هتقولك: أنا مش بتاعت الكلام دة...!

ياما يا شباب حبينا ومشينا وسمعنا الست وعبده وتامر وفتكات، أخدنا إيه يعني...؟ ضاع العمر يا ولدي... وضاعت فلوس الفواتير والهدايا والعزومات... واكتشفنا إن شركة "كادبوري" بتضحك علينا، بشيكولاتة الـ SMS الساذجة... ياما اتأنتكنا واتسشورنا واتبرفنا... وفي الآخر... ولا حاجة...! تلاقي أحلام الحب اليومين دول عاملة زي "بلالين" الهيليوم بتاعت "الفالانتاينز داي" اللي جبناها، بتطير لفووووووووق...!

ومع ذلك، لسة الأغاني الرومانسية اللي بسمعها النهاردة، بتثير الشوق والحنين جوايا، لقصة حب قديمة ومستمرة معايا لحد النهاردة... وكتير اتخيلت كلمات الأغاني بشكل مختلف، يتماشى مع الحب اللي في قلبي، وعبرت عنها على شكل "ستيتسات" كوميدية ع الفيس بوك... أذكر منها على سبيل المثال:

"لسة بتخاف م الفراق لو تيجي سيرتي...؟! لو شفت إيدي بتكتب هتهنج لايبراريك...؟! يعني كودي بيوحشك لو شفت (جار)تي...؟! بتبج بيا حبيبي لما ببج بيك...؟! مين بيأدمن بلات فورمك بعد مني...؟! في ديزاين مين بتحس إحساسك في ديزايني...؟! مش قصدي حاجة أنا بس بشيك عليك... حبيت أسلم أعمل إيه أصلك واحشني...!!"

لو إنت مش زميل مهنة، أكيد هتقول وش إن الكلام دة هيروغليفي...! بس لو إنت زميل مهنة، هتفهم كويس أنا بتكلم عن إيه... هي مقطع من أغنية حماقي، ولكن متحرفة بمصطلحات شغلي... والمعنى العام إن شغلي واحشني ونفسي أرجعله تاني...! برغم إن الموضوع ممكن يكون مش لايق، إلا إن فعلاً الأغاني الرومانسية كتير بحسها ناحية شغلي، لأني فعلاً بحبه حب رومانسي...! طبعاً...! الكمبيوتر هو أمز موزة بالنسبة لي...! والبرامج اللي بشتغل بيها بتمثلي الحضن الدافي اللي بلجأ لحنانه...! ويا سلام بقى لو "ساوند سيستم" نضيف شغال جنبي، يعمل مفعول الفياجرا معايا...! وأفتكر إن آخر شيء عملته قبل ما آخد شنطتي وأنزل عشان أروح الجيش أول مرة، إني "بوست kissed" الكمبيوتر بتاعي...!

ساعات أصحابي القريبين بيستغربوا مني، لما دمي يتحرق، أو عنيا تدمع، أو مزاجي يحلو، عشان خاطر تغير جديد حصل في التكنولوجيا اللي بشتغل بيها...! أو مثلاً لما أفكر إني أدخل في مجال مش مطلوب أوي، لمجرد إني بحبه، ومقتنع بيه، ومصر أشتغل بيه وأعمل بيه فلوس...! وهو الحب إيه غير كيميا...؟ ملوش أساس معين أو أسباب معينة ممكن يقوم عليه... ولكن، الحب هو الحب، وحلاوته إنه كدة، بس...! الشغل في قاموسي هو نفسي وكياني، هو أنا، هو اللي ممكن يرفعني لفوق، أو ينزلني لتحت... شغلي، هو الشيء الوحيد اللي مش ممكن يخذلني أو ينكس راسي، طول مانا بحترمه وبجتهد فيه... الشغل، أهم من الرفاهية، ومن الارتباط، ومن أي حاجة تانية في الدنيا... الشغل هو المتعة، والفلوس، والحياة...!

أي سواق تاكسي ممكن يلخص النقطة اللي بتكلم فيها بجملة صغيرة... لما تبقى راكب معاه وعربيتك عطلانة، وتحكيله عن المشكلة اللي فيها وتستشيره –كأنه خبير-، ويجاوبك ويقولك: "حب العربية، تحبك...!" فعلاً، حب شغلك يديلك... حب شغلك، تحب حياتك... حب شغلك، تجيب العربية البي إم، وتنزل على أي موزّة تعجبك ماشية في الشارع، وتقولها: "ما تيجي ناخدلنا لفتين في العربية...؟"

على فين يا طموح؟

2010-10-17T19:56:00.001+02:00

عندي شوق وإثارة كبيرة جداً للمستقبل، يكاد يصل لشوق وإثارة مرأة، ماسكة في إيدها علبة صغيرة ملفوفة بفيونكة حمرا، مهديهالها خطيبها، أغلب الظن عشان يبوسها...! ما علينا، المهم إنهم شوق وإثارة كتير وخلاص... ولأني من الناس المؤمنة بكتابة خطة للحياة Life Plan بالورقة والقلم، عندي فضول ممزوج بالحماسة والإصرار، ولكن بنكهة الخوف والترقب، إني أشوف هل هقدر أنجز خطتي، وأحقق أحلامي، بالشكل اللي رسمته ليا...؟

وبالرغم من وجود خطة للحياة، فمش قادر أشوف نفسي كمان 10 سنين ممكن أكون "إيه" أو "مين"...؟ فكرة المهندس والدكتور الجامعي صاحب الشركة والعربية والفيلا فكرة كويسة، ولكن حتى لو بقيت كدة، هكون صحيح إنسان متفوق وناجح، ولكن بردو إنسان عادي...! أنا اشتغلت كتير حاجات مختلفة، وخططت كتير لحاجات مختلفة، ومتناقضة... لا لأن ليس ليا خطة ولا هدف، ولا لإني هوائي لا سمح الله... ولكن لأني لازلت شاب في مرحلة البحث عن الإختلاف...! اللي عايز أحققه مش شرط يكون جبّار أوي، بس الأهم يكون مختلف أوي...!

والفكرة إني إنسان ثورجي، دايماً ما أثور على الحاجة حتى لو بحبها، وعلى أي وضع ممكن أكون فيه...! وبما إني عشقت الـ IT قبل أن أهواه أو أحترفه، فطبيعي إني أكون في حالة ثورة ضده... دايماً عندي شعور بإني لو بقيت رئيس جمهورية الـ IT، هقدر أقدم حل جديد، أبسط، وأحسن... وهقدر أعمل تغيير وإصلاح فيه...! الطرق الموجودة حلوة، لكن مش عاجباني... مش على هوايا...! عايز طرق جديدة، ودة من حقي... حقي إني أفكر وأبدع وأبتكر... وأقدم أعمالي للناس وهي اللي تحكم عليها بالقبول أو الرفض... حقي إني آخد فرصتي وأصنع طريقتي وأحكم على نفسي إمتى أكون فشلت، أو نجحت...! حقي إني أختار إن كنت جزء من منظومة أو أني أبني منظومة مستقلة... حقي إني أختار إني أكون حاصل على درجة الدكتوراه أمام الناس، أو أكون حاصل عليها أمام نفسي وأمام سوق العمل...!

ممكن طموحاتي تقودني لأشكال مختلفة من العمل المهني أو درجات مختلفة من العلم الأكاديمي... لكن في النهاية طريقي اللي ماشي فيه هو: إزاي أكون مختلف، وأحقق شيء مختلف...؟!

اللي هتدخل حياتي

2010-10-14T18:03:00.001+02:00

!... بعد ما أحقق ذاتي بقى أبقى أفكر

زي أي شاب، مريت بتجارب وقصص عاطفية، بعضها كان بجد، وبعضها كان فكسان... وكالمعتاد، كل التجارب فشلت فشلاً ذريعاً..! يمكن كل تجربة بتفشل بتضيف في شخصيتي حاجة جديدة، وبتعلمني درس جديد... بس في نفس الوقت، تجربتي الأخيرة خلتني أصرف نظر عن الموضوع دة خالص دلوقتي... لا لإني مش مقتنع بالحب والمشاركة أو اتقعدت منه... أبداً... بس لإني استخلصت حكمة " مش هرتبط بواحدة قبل ما أنجح وأحقق ذاتي الأول"، واللي أعلنتها في بيدج مستقلة على الفيس بوك... أما الحب، فأنا مؤمن بيه جداً، بس آمنت بردو إن له موسم وأوان...! أوقات كتير بكتب ساخراً من البنات والأهل واجراءات الزواج وما شابه... وأطلق سهام الكوميديا السوداء نكايةً بتجارب عشتها أو دروس اتعلمتها... كتير بسمع أبو الليف وأقوله "قول كمان يا كبير"...! كتيروشي بيتقلب لما أشوف بنت وأقول "يااااي، في ميل"...! بس دة ميمنعش إن الكوميديا السوداء شيء والواقع شيء تاني... اه أنا بسخر، بس اه أنا أكيد عايز أرتبط وأخطب وأتجوز، زي أي حد...!

فيه أهداف كتير قدامي عايز أحققها قبل ما آخد قرار الارتباط... مش لأني مش هعرف أحققها وأنا مرتبط، بس لأني هعرف أركز فيها أكتر وأنا مش مرتبط...! لما يكون وقتي وفلوسي وتركيزي ملك نفسي، هقدر أكبّر من نفسي... بغض النظر عن أي اعتبارات أسرية بعيدة عن أرض الواقع، على رأي الزعيم...! مشربش الشاي، أشرب أزوزة... براحتي...! أشتغل في شركة وأقبض فلوس، اشتغل سنة في مشروع شخصي من غير ما أقبض فلوس... أنا حر...! أتصرمح في الشركات اللي على مزاجي وأدي فيها كورسات للناس اللي على مزاجي، في المواسم اللي على مزاجي... محدش شريكي...! محدش يقيّدني ويطالبني دايماً بالإفصاح عن نفسي، أنت بشتغل إيه دلوقتي...؟ -وأصل الإجابة الصريحة عن السؤال دة بتزعل (رجال أعمال الزواج!) الأيام دي-: أنا بشتغل نفسي...!

لما الآشية بتبقى معدن، وبتفكر تتجوز، بتضطر تحول المعدن بقدرة قادر إلى ذهب...! إيشي شبكة، وإيشي نقطة أختها اللي بتولد...! وماله... سنة الحياة... إنما لما تلغي فكرة الذهب من دماغك شوية، بتلاقي أولوياتك في الاستثمار في ذاتك... عشرين ألف جنيه شبكة...؟ طب ما أروح آخد كورس MBA في الـ AUC... واشتغل وفي 6 شهور يرجعولي أربعين ألف مش عشرين كمان...! آه، خلاص أنا رصيدي في البنك بعد ما فتحت دكانة الفول والطعمية بتاعتي -اللي بتأكلني عيش-، يسمح بإني أتجوز... أفكر...! تصدق فيه عربية سكودا جديدة نزلت، بس إيه، وهم...!

أولوياتك إيه...؟ مايكل جاكسون بيقول If you cannot feed a baby, then don't have a baby... أكيد تثبيت رجلك في شغلك قبل بداية مشروع جواز... بس أكيد الجواز أولويته تفوق العربية... صح يا رجالة...؟ أمال أشمعنى البنات مش بتفكر فيها كدة...؟ فليكن... أنا خليت العربية أولوية فوق البنت اللي هرتبط بيها، حتى أشعار آخر...

البنت اللي هتدخل حياتي، وكلامي بلسان شباب كتير حياتها زيي، لازم تفهمني... لازم تقدر إن الحياة عمرها ما بدأت باستقرار ورفاهية... ولما بتبدأ كدة مبتكبرش... لازم تفهم إن يوم ما بطلع من دايرة مصروف أبويا اللي بيشتغل بقاله أربعين سنة، بدخل دايرة دخلي كشاب لسة باديء حياته... فأكيد مستوايا بينزل في البداية... لازم تفهم إني مش مستقر في شغل أو دخل عشان أنا ببني مستقبلي مش بتصرمح في الشركات... لازم تفهم إن وجهة نظري في شغلي هي الأصح، لأن لا هي ولا أهلها هيفهموا في شغلي أكتر مني... ولا حتى أخويا ولا أهلي... لازم تفهم إني إنسان، وشاب، وليا طموح، زي أي حد، ببذل قصارى جهدي عشان أحققه... لازم تفهم إن كل قرش أنا بكسبه بيكون بتعبي وبشغلي، اللي أديته على الوجه الصحيح، فلازم استثمره على الوجه الصحيح...

اللي هتدخل حياتي لازم تفهم إني شاب مبتديء أبحث عن مكان لي في الحياة... لا أبحث عن نيش بنت عمتي وشبكة مرات خالي الصغير... أنا أبحث عن ذاتي وكياني... ممكن أحبها وأموت فيها وأديها عينيا، بس لو أحس إنها هتطلعني لقدام مش هترجعني لورا... لو أهلها يحسسوني إنهم مستنيين يشوفوني في نجاح أكبر، وبيشجعوني، مش نفسم يشوفوا بنتهم في بيت أغلى من بيت بنت عمها، ويحبطوني...! اللي هتدخل حياتي، لازم تستحملني وتقف جنبي لحد ما نرتقي بمستوانا سوا... وعشان ساعتها حتى تحس إنها شاركت بحاجة من الجنة اللي حلمت تعيش فيها...!

طفل في مشهدين

2010-10-14T06:34:00.007+02:00

"هو أنا كل ما أكلمك ألاقيكي وييتنج؟"

المشهد الخيالي في المستقبل

ممدد على السرير ومتغطي باللحاف... ساند ضهري على ضهر السرير... بتفرج على حفيدي –في تانية حضانة- وهو بيكلم نفسه زي المجنون وبيبص حواليه زي الأهبل... بعد شوية أكتشف إنه مش بيكلم نفسه، دة كأنه بيكلم حد، أو حداية (مثنى حد)...! أتشتأ بشفايفي معترضاً على حال هذا الجيل... من ساعة ما ظهرت "أجهزة الاتصال التخيلية ثلاثية الأبعاد فائقة السرعة الجيل السابع عشر"، وانتشرت في وسط الجيل البايظ دة اللي بيأنتم من كي جي تو...! افتكر أيام زمان، أيام الزمن الجميل، لما كنا بنعلق البنات وإحنا طلبة في الجامعة، ونقعد نعمل معاهم حاجات مش لطيفة ورا المدرجات... وآخرنا تليفون من أبو قرص نبعت بيه Love MMS أو نعمل مكالمة 3G Video ساخنة وخلاص... هيييييه راحت فين أيام الزمن الجميل... فعلاً، كنا جيل محترم... مكناش نفكر في الحاجات دي واحنا صغيرين أوي كدة...!

أدي ضهري لحفيدي، وأمد إيدي تحت اللحاف... أمسك جسم بارد... أبص لحفيدي بقلق... أشد الجسم بإيدي... حفيدي لسة مشغول مع الموّزة بتاعته... أطلع إيدي من تحت اللحاف... أبص للي في إيدي بحب... وحمرة الخجل على خدودي... والدمعة بتنزل من عيني... أصيل فعلاً... لسة شغال لحد النهاردة... بس الكلاب، معدوش بيدعموه... فين أيام الـ E71 بتاعي...!!!

المشهد الأصلي في الحاضر

قاعد عند صديقي الأنتيم في بيتهم قدام الكمبيوتر بتاعه... صديقي راح ياخد دش... ابن اخوه الصغير قاعد معايا... بتاع 3 سنين كدة... لسة في مرحلة إنه بيتعلم الأسماء والكلام (هو لسة بيتعلم، بس ممكن يعلمني الحقيقة)... عمال يطلق قذائق متواصلة غير منقطعة من الأسئلة عليا... وأنا عمال أجاوبه ومستمتع بالحوار جداً مع الطفل الصغير... بحب أنا أوي العيال الصغيرة... المهم الأسئلة طبيعية وتقليدية وعمال أضحك وأقول يااااه والله بيفكرني بنفسي أيام ما كنت صغير... نفس أسئلتي... وأتشتأ بشفايفي وأقول: التاريخ بيعيد نفسه يا خوانا... لحد ما نزل السؤال عليا زي الصاعقة:

"هي الفلاشة دي بتاعتك...؟"

تقريباً اللي سمعته صح... وتقريباً التاريخ اتغير ومعادش نفسه، لأني ببساطة عمري ما قلت كلمة فلاشة دي في مرحلة ما كنت بتعلم الكلام، أو لسة مبدأتش أوعى ع الدنيا... الحقيقة أنا مشفتش الفلاشة دي أصلاً غير في ثانوي، وبعدها بسنتين بدأت أعرف إن إسمها "فلاشة"...! قلت لنفسي يا واد يا عبد الله، هو أكيد يعني عادي بيشوفها كتير وعارف اسمها كدة بصم يعني، عشان يرسم عليا ويعملي فيها مفتح... قلتله:

"لا دي هي هنا أصلاً... إنت تعرف الفلاشة...؟"

الطفل: "آه"

"حلوة؟"

الطفل: "آه"

"بنعمل بيها إيه؟"

الطفل: "آه...!"

قلت عيل صغير يا خواننا...!

الطفل: "بس أنا أعرف بتتركب إزاي..."

أنا: "آه...!"

الطفل: "حتى بص..."

مسك الفلاشة، قلبي دق وهو رايح ناحية الـ USB، دخل الفلاشة...!

الطفل: "بنحطها في اليو إس بي كدة...!"

أنا: "آه...!"

المحبط إني عرفت اليو إس بي بعد لما عرفت إن الفلاشة اسمها فلاشة بـ 3 سنين... لما بقيت على وش جواز...! سكت كدة شوية مذهول ومصدوم... طفل إيه دة يا جدعان... طب أتأكد إزاي... فكرة...

أنا: "قول ورايا... بابا..!"

الطفل: "تتح...!!!!"

سوفت سكيلز

2010-10-13T18:09:00.002+02:00

!... الإغراء أيضاً من المهارات الشخصية

المودة النهاردة بلا منازع بعد الساقط والكارينا هي كورسات وكتب الـ "سوفت سكيلز" أو "المهارات الشخصية"، والتي تكمل الـ "هارد سكيلز" أو "المهارات الفنية" في حياة الإنسان مهنياً... يحتاج الإنسان إنه يكون حاوي، عشان يقدر يزرع مهارات وسمات عاطفية في إنسان تاني، بدون تجارب يخوضها...! بمعنى، إن الموضوع –من وجهة نظري- مش بييجي لا بكورسات ولا بقراية وخلاص، إنما بييجي بس بالخبرة والممارسة وتقييم التجارب الشخصية وتحليل جوانب السلب والإيجاب والبحث عن أفضل الحلول لتطوير الذات...

ومن الأمثلة الشهيرة على المهارات الشخصية: مهارات العرض والإقناع والتواصل مع الآخرين... والواضح أنها مهارات تحتاج لشهور طويلة من الممارسة والتجربة والتطوير من أجل أن تصبح مقدم ناجح، أو محاور ناجح...! يمكن الكتب والكورسات بتقدم الخطوط العريضة أو النصائح العامة في مثل هذه الأنواع من المهارات، أو يمكن بتقدم بيئة محاكاة تقدر إنك تتدرب فيها على هذه الأنواع من المهارات... بس دة مش معناه أبداً إن المهارات الشخصية تكتسب بالكورسات أو الكتب، أو بتجارب تمثيلية بين شخص وزملاؤه... المهارات الشخصية تحتاج إلى مرمطة في الحياة عشان تكتسبها...!

فيه أيضاً أمثلة غير شهيرة على المهارات الشخصية، اللي ممكن مبيتكلموش عليها في الكتب ولا الكورسات... أذكر منها على سبيل المثال:

مهارة خلق العلاقات العامة

قعدة القهاوي مع حجر "قَص" بالليل على نغمات أم كلثوم مع شلة الـ "بيزنس" على فور ستارز كوفي شوب... لازال هو المكان المثالي في مجتمعنا للاستمرار في التواصل مع رجال الأعمال التانيين، حيث تضمن إن كلهم قاعدين في مكان واحد في ميعاد ثابت، أشبه بالجمعيات العمومية الدورية المنعقدة في كل سهرة... ويساعدك في دة، فن لعب المحبوسة في حالة البيزنس الشعبي، أو الاستميشن والبلاي ستيشن في حالة البيزنس الهاي ستايل... وكمان، الحرص على مشاهدة الماتشات في الكوفيهات تعيد لك لقاءات وعلاقات مع ناس مهمين أو كنت تعرفهم من زمان، وتفتح سبلاً رائعة من البيزنس خصوصاً لو كنت بتشجع نفس فريق الراجل وإنت أساساً ملكش في الكورة..!

مهارة تلبيس الزبون العمة

أكبر وأكثر الشركات احتراماً لا يشغلها أكتر من فنون وسبل تلبيس الزبون العمة، مش شرط تكون بتغشه في بضاعة فاسدة، بس مش ممكن يكون منتج ما أو خدمة ما هي الأفضل أو الأعلى في المستوى... حتى أردأ أنواع البسكويت في مصر يكتب عليه "فاخر"...!

فمثلاً تلاقي الشركات اللي بتقدم خدمة بتستقبلك بريسبشن من الكنب الفاخر العريض، وابتسامة ترحيب عريضة وساحرة من موزّة، مع الصوت السياحي الناعم: "مرحباً بيك يا فندم"، لتجعلك أنت في خدمتها على الفور...! والموزّز بردو ليهم ابتسامة ترحيب عريضة وساحرة بس من شاب ستايل، عينيه ملونة، والنمش هياكل من خدوده حتة، وشعره مسبسب ومتسشور... يا قلبي بقى لما بيكون شايل موبايل تاتش...! وبكدة أصبحت الموّزة العميلة هي اللي بتتصل كل شوية عشان تتابع مع الشركة، خصوصاً في الفترات المسائية، ونوفر على الشركة فواتير التليفون..!

مهارة مصلحني أمصلحك

وهي المهارة الأولى في التعامل مع الآخرين... عايز طلباتك تبقى دايماً مجابة عند الآخرين...؟ عايز تلاقي مساعدة الآخرين ليك دايما موجودة...؟ لازم تعمل جمايل في الناس عشان تكسر عينها، أو تخلي ليهم دايماً مصلحة ما عندك، عشان تلاقي الناس حواليك دايماً سلسين عند إجراءك لأمر ما والحاجة ليهم في الطريق...! مصلحني أمصلحك، وشهيصني أشهيصك... اللي مستفدش منه أنفضله... واللي بستفيد منه أتصل أطمن عليه...! عند بعض الشباب المهارة دي بتوصل لدرجة إنه بيعلق البنات بنظرة أو كلمة، عشان تفضل دايماً تلبيله في طلباته ظناً منها إنه العريس المنتظر..!

مثل هذه الأمثلة من المهارات لا يصح إنها تتقال في الكورسات أو الكتب، بس هي الواقع والحياة...! والقائمة لا تنتهي، والمهارات التي نتعلمها من الحياة كثيرة جداً... بس تحتاج إلى جرأة المغامرة والتجربة، وشجاعة الخطأ والمواجهة، والنظرة النقدية في تقديرك للأمور... لا تسليم العقل والقلب إلى نصائح فئة من المدربين أو الكاتبين قصيرة الخبرة في أمور الحياة اللي من الممكن إنها لم تتعدى حدود سطور الكتب أو حكاوى أبلة طازة...!

كوميديا الحياة

2010-10-13T07:56:00.002+02:00

أحلى حاجة في الحياة، إنها كوميدية... وبتزيد الكوميديا أكتر كل ما بتضيق أكتر وبتصعب أكتر... تحس إن الـ fun في الحياة هو built-in أو بالعربي "منه فيه"...! وأكثر الأشخاص اللي ممكن يضحكوك هم نفسك قبل الناس التانية اللي حواليك...! كام مرة ضحكنا على نفسنا من غباءنا أو عبطنا أو من موقف صعب أو موقف محرج مرينا بيه...؟ وممكن كمان بطريقة غير مباشرة، تنزل ضحك على حاجة في كتير من الناس التانية اللي حواليك، وتبقى إنت في الحقيقة بتضحك على نفسك بعدد الناس اللي ضحكت عليهم لأن كل اللي بتضحك عليه دة، فيك...!

الإنسان الغير مرح، بس، هو اللي بيقفش قدام الصور الصعبة المضحكة... ليه تاخد الدنيا على صدرك، لما ممكن تسحبلها من جوة قلبك قهقهة مجلجلة، ترج الدنيا...؟! إزاي منضحكش من قلبنا على مشهد سلك عريان، أو بلاعة مفتوحة، أو مدرس مقصر في شغله...؟ ونعمل قفشات على غرار: "السلك عريان، طب مين اللي قلّعه...؟ هع هع هع هع"، و "بلاعة مفتوحة، طب مين اللي فتحها...؟ هع هع هع هع"، و "مدرس مقصر في شغله... طب هيطوّل إمتى...؟ هع هع هع هع"...!!!

هذا النوع من الـ "ألش" هو اللي بيخلي عجلة الحياة تستمر... وقدرة الإنسان على إبداع الكوميديا تنتج من الظروف الصعبة اللي بيمر بيها، أو الصور الصعبة اللي حواليه... يمكن عشان كدة مصر رائدة ومشهورة في مجال صناعة الكوميديا، بعد زراعة الكوسة طبعاً...! بتضحك؟ طيب اضحك، على نفسك وعليا وعلينا كلنا...! بجد... هناخد منها إيه غير الضحك والفرفشة، واللحظة الحلوة اللي بنعيشها...؟

ذكريات الكلية بالنسبة لي مفهاش مستوى التعليم الرديء اللي حصلت عليه ولا التعنتات الروتينية المختلفة اللي قابلتها، إنما بفتكر ذكرى حلوة وقلبي يدق لها، يوم ما اطردت من سكشن، أو اتهزأت في محاضرة، أو اتقفشت بالعربية جوة الجامعة، أو موقف محرج حصلي مع بنت زميلتنا... بفتكر زمايلي وأصحابي اللي عشت معاهم أحلى ضحكة وأحلى لحظة وأحلى ذكرى... بفتكر حفلة التخرج وإحنا متجمعين عشان نتصور ومفيش مكان من كتر الزحمة في المكان الضيق جداً اللي كانت معمولة فيه، وأضحك... وأقول يا ريت الأيام دي تعود من تاني...!

فقرة الصور بتاعت عمرو أديب في القاهرة اليوم، تتكرر معانا كل يوم في كل مشهد بنشوفه في بلدنا حوالينا، تضحك عليه من غباوته أو استفزازه، وتحس إنك عايز تصوره بالموبايل وتبعته لعمرو أديب وإنت عارف هو هيقول إيه، وتضحك...! شفت كام عربية نقل مكتوب عليها: "أنا البرنس" أو عربية ميكروباص مكتوب عليها: "فأغشيناهم فهم لا يبصرون" لصرف المخالفات الشريرة...؟! شفت كام يافطة أقصى سرعة 40 في الطرق السريعة الدرجة الأولى، اللي مبمشيش فيه أقلها عربية أقل من 140 كم/س...؟! شفت كام بوكس داخل الشارع مخالف، ويركن يشتري سندوتشات فول وبتنجان...؟! شفت كام عربية ممسوحة لوحها ومكتوب مكانها عبارات معنوية دينية على غرار: "اذكر الله"...؟!

يا صديقي، ليه تقعد تحبط في نفسك...؟ كونك عاطل أو مفركش أو داخل جيش دة مثلاً يعني أو محبط من الأوضاع الصعبة والمشاهد الصعبة اللي حواليك، لا يعني إطلاقاً إن ابتسامتك للحياة تختفي...! الحياة –بمشيئة الله طبعاً- لسة جاي فيها أيام كتير... اللحظة الصعبة بتفوت، وبيتبقى منها الذكرى الحلوة... الأوضاع اللي حوالينا بإدينا، نقدر من غير ما نفقد ابتسامتنا، نغيرها... ولو فشلنا، بردو هنضحك على القفشات الحلوة اللي مرت علينا، في لحظات ما حاولنا نغيرها...!

اليأس والإحباط أعداء الحياة، اقتلهما بابتسامتك الساخرة يا صديقي، وثقتك بالله سبحانه وتعالى، وبنفسك، وبقدراتك... :-)

ثورة 2053

2010-10-13T06:39:00.004+02:00

"ثورة 2053 - البداية" دة اسم رواية للكاتب محمود عثمان... الرواية دي شيقة جداً، وأسلوبها رائع، وفكرتها جامدة... الرواية يتدور حول المستقبل في مصر، بتمزج بين الخيال العلمي، وواقعية تطور الأحداث والمجتمع، من خلال مهندس إنشاءات شهير وشخصيات أخرى... اللي عجبني فيها جداً هو التفاصيل العلمية للحياة في المستقبل، والخيال الواقعي، بالإضافة للدراما النفسية والصور المتسلسلة للأحداث والشخصيات اللي بتثير جوة الذهن تسائلات كثيرة جداً عن الحياة ونظرتنا القديمة ليها... عمل أكثر من ممتاز، وبعد لما تخلصه هتحس إنك ملهوف جداً تقرأ الجزء التاني ليها، بعنوان "ثورة 2053 - البداية مرة أخرى"، اللي أنا لسة شاريها من يومين ومتحمس جداً إني أقراها...

نصيحة روح اشتري الجزئين مرة واحدة، وابدأ قراية على ضمانتي... أنا جبت الكتاب من بوكس آند بينز.. :-)

الكتاب على Goodreads.

حلم إيه؟

2010-10-13T04:46:00.002+02:00

قصة البلوج بتاعي عادية جداً... العنوان بتاع البلوج abdallamahmoud.blogspot.com كان عندي من زمان جداً... في البداية، كنت بنشر عليه مواضيع تقنية باللغة الإنجليزية، وبعد فترة مسحت المواضيع كلها من البلوج، واكتفيت بصفحتي الرسمية على الويب، في عرض الجانب المهني من حياتي... بعد كدة، فضل البلوج فاضي فترة طويلة... وكل ما أبدأ أكتب فيه أمل أو ملاقيش حاجة أقولها، فأهملته...

قبل ما أدخل الجيش بفترة قصيرة، فكرت إن جوايا أحلام كتير أوي في حياتي نفسي أحققها... وأنا بعتبر الحياة رحلة طويلة –كما يشاء الله- هدفي منها إني أحقق أهدافي وأحلامي... ففكرة إني هبعد عن حياتي المهنية فترة طويلة أثارت جوايا تعطش أكبر لأني أحقق الأحلام اللي حلمت بيها لحياتي.. واعتبار نهاية الخدمة العسكرية نقطة البداية الكبيرة لحياتي المهنية... ومن هنا لقيت إن عنوان "الحلم" أكتر عنوان متفق مع الحالة النفسية اللي بعيشها...وعشان كدة اخترته... واخترت وصف أن "أعظم ما يحققه الإنسان في حياته، أن يحول حلمه إلى حقيقة، في حياته...!"، لأني أتمنى ذلك...

الكتابة في "البلوجز" متعة، حتى لو مفيش حد بيقرأ اللي بتكتبه... بس دايماً التعبير عما بالداخل بيعطي الشعور بالراحة، خصوصاً لما يكون التعبير دة على الملأ...!

ننوس ورقم 7

2010-10-13T04:09:00.006+02:00

نانسي عجرم دي زي العسل، أنا بموت فيها أصلاً... :) بس وات إيفر... ألبوم No.7 عجبني جداً... الـ 16 أغنية كلماتها راقية وجديدة، وألحان وأداء عالي... أكتر أغنية عجبتني في الألبوم، وعجبتني أوي الحقيقة، هي الأغنية رقم 16 "حكايات الدنيا"... فكرة الأغنية جديدة، بتتكلم عن مشاعر أم تجاه ابنها، وذكرياتها مع باباها ومامتها... أد إيه هي بتحب ابنها فأكيد كانوا أد إيه بيحبوها... أد إيه هي بتتعب عشان ابنها، فأد إيه أكيد كانوا بيتعبوا عشانها... كلمات رائعة... وألحان رائعة... وإحساس رائع في الغناء...

دي كلمات الأغنية منقولة من أحد المنتديات:

من غفوة عنيا ندهنى صوت بحبه

اخدتنى الحنيه وسهرت الليله بقربه

وصار يجى عبالى غالى وغالى عرفت قيمة حالى عندن وعرفت شو تعبو

هيك حكايات الدنى بتبتدى من الولدنى

تايكبر حدا لازم يتعب حدا وسنى بتسابق سنى هيك حكايات الدنى

هالصوت يسلملى بعده سنينه جداد وعالسمى بيرسملى جوانح فرح وولاد

ذكريات كتيرة لما كنت صغيرة كانت حدى سريرى الدنى تشتى صلى واعياد

هيك حكايات الدنى بتبتدى من الولدنى

تايكبر حدا لازم يتعب حدا وسنى بتسابق سنى هيك حكايات الدنى

ودي الأغنية ع اليو تيوب:

برافو يا ننوس...!

الموضوع ببساطة...

2010-10-13T03:50:00.003+02:00

السؤال اللي ساعات بسمعه من أهلي أو أصدقائي، أنا عايز أوصل لإيه بالضبط؟ خاصةً وإني مش بشتغل في شركة معينة، واعتمادي كله على الـ part-time الموسمي، الغير ثابت الدخل أو الكيان... وإني رفضت أكمل مشوار إني أتعين في الجامعة وأنا طالب، أو حتى إني أقدم في جامعات خاصة بعد التخرج... ورفضت إني أقدم حتى في شركات برمجة عشان أبدأ مشواري المهني الحقيقي من وجهة نظر الغالبية العظمى من العاملين في نفس المجال، كخريج لكلية الحاسبات والمعلومات قسم علوم الحاسب...

بس أنا عايز أقول إن أجمل سنين حياتي، على الإطلاق، هي السنين اللي قضتها في الشغل كمدرب برمجيات... غير إن التدريب والبرمجة هما المجالين اللي لقيت فيهم نفسي واستمتعت جداً بكل لحظة شغل فيهم، كمان حسيت إن فيه مشوار بدأت فيه من الصفر اعتماداً على الجهود الذاتية فقط، بعد الله سبحانه وتعالى، وقدرت أحقق شيء أنا راضي عنه... الحمد لله... وحابب إني أكمل فيه...

مجال التدريب يمكن بيثير للكثير من الناس مشاعر متضادة... فيه ناس بتشوف التدريب على إنه مهنة مؤقتة أو لا تختلف عن الدروس الخصوصية في شيء... وفيه ناس تانية بتشوف المدرب على إنه شخص من الطبقة اللوكال اللي مقدرتش إنها تلحق لها مكان في مجال الهندسة البرمجية... ميمنعش إن فيه ناس بتحترم قدر شخصية المدرب... إلا إن الثابت عند الغالبة العظمى من الناس العادية إن التدريب بالنسبة لهم مجال مجهول الملامح ومجهول العائد والهدف...

التدريب مختلف جذرياً عن الهندسة وعن التدريس... التدريب مختلف عن الهندسة، في إن التدريب هو صناعة المهندس، أو صناعة اليد العاملة في مجال الهندسة... وبالتالي من المنطقي إن المدرب هو شخص يجب أن يكون في الأصل مهندس متفوق... والتدريب مختلف عن التدريس، في إن التدريس يهدف إلى اجتياز طالب لامتحانات نظرية، في حين إن التدريب يهدف إلى تنمية قدرة المتدرب على الالتحاق بسوق العمل... التدريب هو مهنة تفوق المهندس والمدرس في متطلباتها... هي علم وحنكة المهندس، وبساطة وفطنة المدرس، وروح القائد والمدير...!

أنا شخصياً بفتخر جداً لما أقدم نفسي كـ "مدرب برمجيات"، أكتر ما أقدم نفسي كـ "مهندس برمجيات"... برغم إن اسم المهنة نفسها قد يكون غير مألوف لآذان العامة، إلا أن قدرها كبير جداً بالنسبة لي... دة ميمنعش إن جوايا أحلام كتير جداً في مجال الهندسة البرمجية والإنتاج... ولكن التدريب لايزال هو الـ career بتاعي...

بالنسبة لشغل الجامعة أنا رفضته لا من باب خالف تعرف، ولكن الدنيا هواءً... أنا هوايا الشغل الـ Technical مش الـ Scientific، والفرق كبير... لأن قدراتي في التعامل مع التقنية أكبر من قدراتي في التعمل مع العلم البحت... ومش هوايا إني أضحك على نفسي في مجال مش حاسس بنفسي فيه لمجرد إن يكون إسمي "دكتور جامعي"، لا ينتج علماً ولا يقدم نفعاً للناس... وأكتفي بالامتيازات المادية الزهيدة والامتيازات الاجتماعية البالية... في حين إن الشغل الخاص سواء في التدريب أو البرمجة بيستهويني أكتر وبحس إني بقدر أبدع فيه وأعمل حاجة... الموضوع دة برغم إنه اتقفل من سنين، إلا إن وحتى بعد التخرج لازال أهلي أو أساتذتي بيناقشوني فيه... الموضوع ببساطة إني اخترت المجال اللي بحبه...!

الشغل في البرمجة أنا مش حابه، أنا بعشقه... وأنا في الأصل مبرمج قبل أن أكون مدرب (ودة المطلوب طبعاً)، ومبرمج عاشق للكود يقع سريعاً في خطيئة فتح الـ IDE...! بس أنا جربت العمل المنتظم في شركة ومقدرتش أكمل أكتر من أسبوع من الملل...! وأنا من النوع اللي ببرمج بقلبي مش بعقلي، فلو مكنتش بحب المشروع مش هعرف أعمله كويس... بمعنى، المشروع اللي أعمله من أول الفكرة لحد ما تظهر للنور، هو دة المشروع اللي أقدر أدي فيه... إنما المشروع اللي يكون مفروض عليا، مع تيم معين، مقدرش أدي فيه بنفس القدر، ومش بلاقي نفسي في الوضع دة... دة غير إن الـ donkey work سخيف ومحبط، والـ ERPs أكل عليها الدهر وشرب وتجشأ ثم تقيأ...! اتجاهاتي كلها في إني أشتغل في الـ innovative work... الموضوع ببساطة إني عايز أنتج مشاريع مش أشتغل مبرمج في شركات...!

بالنسبة للدخل الثابت والشغل الموسمي... ومين النهاردة بيشتغل بدخل ثابت بخلاف الموظفين الغلابة...؟ في كل الأحوال الحياة صعبة... مع إن الشغل الموسمي دخله في الحقيقة أكبر من الشغل الثابت... خاصةً إنه بيعتمد على نظرية الدخل على قدر العمل... زي سواق التاكسي كدة... كل ما بتشتغل أكتر وتتنطط أكتر، كل ما تكسب أكتر.... في حين إن المهندس –خاصةً في مصر- بيشتغل أكتر ويتنطط أكتر مجبراً وبدون مقابل سوى الاحتفاظ بالوظيفة أو تفادي الخصم، او طمعاً في ترقية مهنية لا معنى لها على أرض الواقع...! حتى المهندسين اللي على درجة عالية من الاحتراف، الإدارة في الشركات المصرية عندها القدرة على الاستغناء عنهم والوصول لنتائج بديلة أرخص دونهم... الموضوع ببساطة إني عايز أكون المنتج والممثل والمخرج في نفس الوقت... ومستني أكتسب الخبرة الكافية عشان أبدأ خطوة في طريق إنتاج البرمجيات، تحت brand مستقل، إن شاء الله...

كمان أنا عايز أكمل أكاديمياً وأمزج بين العلم وإنتاج البرمجيات في رسائل الدراسات العليا... وبكدة أكون ماشي على نفس الهوى... وهو إني أنتج تقنية لا علماً... يكون ليها مكان في السوق... وتستحق أن يخلق لها brand مستقل...!

مش عارف عرفتوا عايز أوصل لإيه ولا لأ... بس باختصار أنا عايز أكمل في التدريب في نفس الوقت عايز أكمل أكاديمياً في نفس الوقت اللي مشاريعي الأكاديمية تكون صالحة للسوق... بعد ما أوصل لدة أبدأ بقى أفكر في brand برمجيات... وأنا بحب نفسي زي مانا كدة... بشتغل شغل موسمي بنظام الـ part-time... دخلي غير ثابت... لا أنتمي لشركة معينة... حر نفسي وحر في بناء مستقبلي زي ما بحلم بيه... مش لازم يكون زي ما غيري بيحلم بيه... وأحلى ما في الموضوع طبعاً إني مش متجوز ولا خاطب ولا مرتبط...(!) ليه ماديش لنفسي فرصتي وأمشي في الطريق اللي بحبه، بغض النظر عن أي اعتبارات اجتماعية أو مادية موروثة...؟؟!!!

"جاست أنازر" رأي عن الحب

2010-10-12T03:44:00.002+02:00

بيس... الحب أجمل حاجة في الدنيا... الله على الليالي الطويلة اللي بنقضيها قدام الفتارين في الشوارع عشان ندفع سرراً من الجنيهات مقابل هدايا قيمة وأنيقة ومختلفة تفاجيء بيها اللي بتحبه... يا حلاوة الساعات اللي بنقضيها بالليل عشان نكرر في أسطوانات كلمات الحب والغرام في التليفون (إن عربي: الموبايل)... يا عيني على أحلام الليل والنهار، وأحلام الحياة الدافئة في كل ركن تعرفه في الدنيا من حواليك بس مع الحد اللي انت بتحبه... يا ليل يا عين بقى، لما تعد كام مرة حصل –بعد الشر- إنك حبيت، وعشت، وفركشت، واتعلمت، ووقعت بعديها على صف سنانك تاني، وعشت، و...؟! كام مرة عشت فيها قصة حب مع بنت، وبقيت تعرف كل صاحباتها، وأصحابك فيهم اللي بيحبوا من صاحباتها، والشلة كبيرة ولذيذة، والحياة العائلية الجماعية الوهمية مدياك النشوة والانتماء، والإقبال على الحياة، حتى تتخلص واحد واحد إنت وأصحابك، من واحدة واحدة هي وصاحباتها، وتبعد عن أصحابك مع مرور الزمن... وتكتشف بعد كل دة، إنك كنت هااااااااااااااايف...؟!! كام مرة ضربت البدلة الشيك، والبارفان التمام، وتخش في بيوت الناس... عشان ترجع من تاني بعد الوقعة على صف اسنانك، لصاحبك القديم تحكوا وتتباحثوا قصة فشلك...؟!!! كام مرة شفت البنت اللي بتحبها في يوم من الأيام، مع واحد تاني غيرك... وتتخيل نفسك في يوم مع واحدة، كانت مع واحد تاني غيرك في يوم...؟!!!!

كام مرة وكام قصة وكام حكاية، وكام نصيحة من أخ كبير لأخ صغير، إن اتعلموها بقى يا خوانا...! الحب من بدري بينتهي بفشل أكيد... زي لما كنت في الجامعة تبص على قصة أخوك الصغير اللي في الثانوي مع البت بتاعت اعدادي، أكيد هتفشل...! إنت كمان لما بتخلص، وبتحط رجلك على الدنيا، بتشوف نفسك في الجامعة زي ما كنت بتشوف أخوك الصغير اللي في ثانوي مع البت بتاعته...! قصة فااااشلة... لأنها بدرىىىىى...!!

ولو كانت اسطوانة "بحبك... يا حبيبتي... يا حياتي... يا قمري" مشروخة، فالشرخ في اسطوانة "إنت مين يا حبيبي؟؟ بتشتغل إيه يا عنيا؟؟ معاك إيه يا ضنايا؟؟" أجود وأعلى صوتاً...! إنتاج جميع البيوت المصرية... متغلغلة في أعمق أعماق نفس البنت المصرية، اللي بيتبادى ليك في الأول إنها الزاهدة الصبورة الحنونة...!

أخي الشاب... وفر فواتير التليفون والهدايا والفضة ووقتك وصحتك وشبابك لنفسك... وقف في طابور "العرض" لتحصل على "الطلب" المناسب في الوقت المناسب... كما فعل السابقون...!

قم للمغني - قصيدة لريوف الشمري

2010-09-10T07:09:00.001+03:00

قصيده للشاعرة / ريوف الشمري

"قٌمْ للمغنِّيْ ووفِّهِ التصفيرا كاد المغنِّيْ أن يكون سفيرا

يا جاهلاً قدر الغناء و أهلِهِاسمع فإنك قد جَهِلتَ كثيرا

أرأيتَ أشرفَ أو أجلَّ من الذي غنَّى فرقَّصَ أرجُلاً و خُصورا

يكفيهِ مجدا أن يخدرَ صوتُهُأبناء أُمة أحمدٍ تخديرا

يمشي و يحمل بالغناء رسالةًمن ذا يرى لها في الحياة نظيرا

يُنسي الشبابَ همومَهم حتى غدوا لا يعرفون قضيةً و مصيرا

الله أكبر حين يحيي حفلةً فيها يُجعِّرُ لاهياً مغرورا

من حوله تجدِ الشباب تجمهروا أرأيت مثل شبابنا جمهورا؟!!

يا حسرةً سكنت فؤاديَ و ارتوتْحتى غَدَتْ بين الضلوعِ سعيرا

يا عين نوحي حُقَّ لي و لكِ البكاءابكي شبابا بالغنا مسحورا

يا لائمي صمتا فلستُ أُبالغُ فالأمرُ كان و ما يزالُ خطيرا

أُنظر إلى بعض الشبابِ فإنك ستراهُ في قيد الغناءِ أسيرا

يا ليت شعري لو تراهُ إذا مشى متهزهزاً لظننتهُ مخمورا

ما سُكرُهُ خمرٌ و لكنَّ الفتى من كأسِ أُغنيةٍ غدا سِكّيرا

أقْبِح بهِ يمشي يُدندنُ راقصاً قتلَ الرجولةَ فيهِ و التفكيرا

لولا الحياءُ لصحتُ قائلةً لهُ (يَخْلفْ على امٍ) قد رعتكَ صغيرا

في السوقِ في الحمامِ أو في دارهِ دوماً لكأس الأُغنياتِ م ُديرا

إنَّ الذي ألِفَ الغناءَ لسانُهُ لا يعرفُ التهليلا و التكبيرا

حاورهُ لكنْ خُذْ مناديلاً معك خُذها فإنك سوف تبكي كثيرا

مما ستلقى من ضحالةِ فكرهِ و قليلِ علمٍ لا يُفيدُ نقيرا

أما إذا كان الحوارُ عن الغنا و سألتَ عنْ ( أحلام ) أو (شاكيرا )*

أو قلت أُكتب سيرةً عن مطربٍ لوجدتِهُ علماً بذاك خبيرا

أو قلتَ كمْ منْ أُغنياتٍ تحفظُ سترى أمامك حافظاً نحريرا

أما كتابُ الله جلَّ جلاله فرصيدُ حفظهِ ما يزالُ يسيرا

لا بيتَ للقرآن في قلبٍ إذا سكن الغناءُ به و صار أميرا

أيلومني من بعد هذا لائمٌ إنْ سال دمعُ المقلتين غزيرا

بلْ كيف لا أبكي و هذي أمتي تبكي بكاءً حارقاً و مريرا

تبكي شبابا علَّقتْ فيهِ الرجا ليكونَ عند النائباتِ نصيرا

وجَدَتْهُ بالتطريبِ عنها لاهياً فطوتْ فؤاداً في الحشا مكسورا

آهٍ..و آهٍ لا تداوي لوعتي عيشي غدا مما أراه مريرا

فاليومَ فاقتْ مهرجاناتُ الغنا عَدِّي فأضحى عَدُّهنَّ عسيرا

في كل عامٍ مهرجانٌ يُولدُ يشدوا العدا فرحاً بهِ و سرورا

أضحتْ ولادةُ مطربٍ في أُمتي مجداً بكلِ المعجزاتِ بشيرا

و غدا تَقدُمُنا و مخترعاتنا أمراً بشغلِ القومِ ليس جدير ا

ما سادَ أجدادي الأوائلُ بالغنا يوماً و لا اتخذوا الغناء سميرا

سادوا بدينِ محمدٍ و بَنَتْ لهمْ أخلاقُهمْ فوقَ النجومِ قُصورا

و بصارمٍ في الحرب يُعجِبُ باسلاً ثَبْتَ الجنانِ مغامرا و جسورا

مزمارُ إبليس الغناءُ و إنهُفي القلبِ ينسجُ للخرابِ سُتورا

صاحبْتُهُ زمناً فلما تَرَكْتُه أضحى ظلامُ القلبِ بعدَهُ نورا

تباً و تباً للغناءِ و أهلهِ قد أفسدوا في المسلمين كثيرا

يا ربِّ إهدِهِمُ أو ادفع شَر َّهُمْ إنَّا نراك لنا إلهي نصيرا "

النفس الطويل

2010-09-07T04:58:00.005+02:00

لما بفكر مع نفسي في النجاح، والناجحين، وإزاي قدر اللي قبلي يحققوا ذاتهم، وإيه السر اللي بيخلي ناس بإمكانيات عالية مقدرتش تحقق طموحاتها، وناس تانية بإمكانيات أقل قدرت تحقق طموحها، بلاقي إن فيه عامل مشترك ثابت في كل النماذج... العامل دة هو: النفس الطويل...!

أفتكر في مرة من المرات بالصدفة، كنت في قعدة فيها أحد رجال الأعمال متوسط التعليم، قال جملة معلقة معايا لحد دلوقتي:

"مفيش حاجة إسمها واحد يعمل مشروع، ويفشل... فيه حاجة اسمها واحد يعمل مشروع، ويفضل وراه لحد ما ينجح...!"

مقدرتش أنسى الجملة لأنها متفقة مع وجهة نظري، ولخصت أهم عوامل النجاح في جملة بسيطة مقنعة ومنطقية، النفس الطويل...!

فيه شباب كتير عنده أفكار جميلة جداً، قابلة للتنفيذ والنجاح... بس للأسف، ممكن ميبقاش عنده الجرأة إنه يبدأها، أو الدافع... وإن توافروا، ممكن يزهق بسرعة، أو ييأس بسرعة مع أول معوق، أو ينسى الفكرة مع أول تجربة فاشلة... كتير منهم بيكون عنده الإمكانيات فعلاً لإنه يحقق ذاته وأفكاره، بس للأسف، نفسه مش طويل...!

فيه شباب تاني كتير عنده أفكار متوسطة، مشكوك في قابليتها للتنفيذ، واحتمالات نجاحها ضعيفة... لكن، عنده الجرأة إنه يبدأ، والدافع... مبيزهقش، ومبيأسش قدام أي معوقات، وبيبدأ يحلها، ويعيد تقيم تجربته وتكرارها بعد كل محاولة فاشلة... كتير منهم ممكن تكون أصلاً إمكانياته ضعيفة، بس عنده أهم عامل من عوامل النجاح، النفس الطويل...!

فيه أفكار كتير جداً في الدنيا دي كانت غريبة، واتعملت، ونجحت... وفيه ناس كتير في الدنيا، بتلاقيهم حواليك، عمرك ما تتخيل إنهم ينجحوا، ونجحوا... بس دايماً كان فيه إصرار على الفكرة، ونفس طويل، نابع من الإيمان بالله، وبالفكرة، وبالذات مهما إن كانت إمكانياتها...!

نصيحتي لكل الشباب وأنا منهم، لو عندك فكرة ما، مهما إن كانت غريبة أو مجنونة، بس مقتنع بيها، ومتخيل صورتها وهي ناجحة في خيالك...متترددش، توكل على الله، وابدأ، وخليك ورا فكرتك لحد آخر نفس... إحنا لسة في سن صغيرة، السن اللي قدر فيه كل العظماء إنهم يغيروا العالم بأفكارهم، ونفسهم الطويل وراها...!

غمض عنيك... وإحلم معايا

2010-08-26T20:07:00.003+02:00

أنا شايف إن الفرق الجوهري بين الشاب وأي مرحلة عمرية تانية مش السن، ولا الشكل، ولا الصحة... الفرق بين الشاب وغيره هو "الحلم"... إن يكون فيه حلم معين بيحلم الإنسان إنه يحققه في حياته... عشان كدة، الـ "شاب" اللي عنده 20 سنة، ومبيحلمش بأي حاجة خالص، مفتقد للـ "شباب" كصفة، وينطبق عليه المزحة الشهيرة: "عجز بدري"...! حتى الرجل اللي تجاوز الـ 50، وعنده حلم بيحلم يحققه في حياته، أقدر أوصفه بإنه "شاب"... وعلى رأي المثل، الشباب شباب القلب... القلب الشاب، هو القلب اللي بيحلم... والقلب اللي مبيحلمش، قلب ميت...!

والأحلام، أنواع... فيه أحلام النوم ودي معروفة طبعاً... وفيه أحلام اليقظة، وهي تمني أمور معينة عايزينها بشدة... كتير من الأحلام اللي بنشوفها وإحنا نايمين، بتعبر عن رغبات جوانا فعلاً عايزينها تتحقق... ومش صحيح إن الأحلام اللي بنشوفها وإحنا نايمين، بتيجي من كتر التفكير في شيء معين... كتير بنحلم بحاجات إحنا عايزينها أوي، ومكنتش خاطرة في بالنا أصلاً... وكتير بنحلم بحاجات عايزينها ونسيناها، ونرجع نحس إننا عايزنها من تاني... أما أحلام اليقظة، فهي مرتبطة دايماً بمعطيات الواقع... يعني طالب في طب، بيحلم يكون أشهر جراح في مصر... لعيب كورة ناشيء، بيحلم إنه يكون زي أبو تريكة... وهكذا... صعب إن واحد في طب ومبيلعبش كورة، يحلم بإنه يكون أبو تريكة... وبردو صعب أو تريكة، يحلم إنه يكون أشهر جراح في مصر...! يعني، أحلام اليقظة، وحتى أحلام النوم، مرتبطة دايماً بمعطياتنا وقدراتنا... وعلى رأي الشاعر، الحلم مش مستحيل، مدام تحقيقه مباح... مفيش أي إنسان ينقصه أي قدرة مادية على تحقيق أي حلم... وأي إنسان ناجح وبارز، كان في الأصل إنسان عادي، واحد جنب ملايين من الناس العادية اللي بنشوفهم كل يوم...

دة على المستوى المهني... فيه أحلام تانية على المستوى الحياتي المادي... واحد بيحلم يجيب عربية هامر... واحد بيحلم يتجوز هيفاء... واحد تاني بيحلم يسافر ريودي جانيرو... وهكذا... وكلها أحلام، في الأصل، مرتبطة في المقام الأول بالأحلام المهنية... يعني مش ممكن أبقى موظف في البريد وأجيب عربية هامر... ومش ممكن أتجوز هيفاء بشبكة صيني... ولا ممكن أسافر ريودي جانيرو وأنا مش لاقي أدفع إيجار الشقة..! يعني، مش ممكن أحلم بأحلام مادية، بدون أحلام مهنية... في الحالة دي، يبقى الحلم مستحيل، وتحقيقه غير مباح...!

فيه بقى أحلام، أنا بصنفها على إنها لا تستحق إنها يطلق عليها أحلام من الأساس... يعني مثلاً، واحد عايز يتخرج، ويتوظف في أي شركة، ويتجوز، ويخلف...! فين الحلم هنا؟ ما هو دة الطبيعي أصلاً...! حتى أقل الفئات في المجتمع بتشتغل وبتتجوز وبتخلف... واحد تاني بيحلم إنه يربي ولاده كويس... صحيح شيء صعب، بس بردو مش حلم... ما هو الطبيعي إني أربي ولادي كويس، مش هربيهم تربية شوارع يعني...! الحلم، عشان يبقى حلم، لازم يكون بشيء خارج نطاق "العاديّات" (جمع عادي لو صح التعبير)... حاجة كدة تكون كبيرة، مش لازم كبيرة أوي... بس حاجة لما الإنسان يحققها، يحس إنه عمل حاجة مش عادية... يحس بالنشوى والتميز لما يحققها... يحس بالاختلاف لما يوصلها...

متفق معايا على المقاييس دي...؟ طيب... هل الشباب عندنا، نقدر نوصفهم بصفة "الشباب"...؟ للأسف، كتير لأ... كتير من الشباب حوالينا مفتقد الحلم... يعني الشاب اللي بيحلم بالعربية الهامر والعروسة الموزة، بس...! من غير أي أحلام مهنية... بيحلم بالحاجات دي وهو قاعد في النادي، وهو في أوضة البلاي ستيشن، أو وهو مقضي السهرة ع التليفون مع ريمو...! دة شاب أحلامه مش ممكن تتحقق... والحلم في الحالة دي هو تمني للمستحيل... ويخرج برة دايرة الأحلام اللي أنا أفهمها... لما يكون الحلم مادي على غير خلفية مهنية، دة ميبقاش حلم أصلاً...!

طيب... واحد بيحلم إنه يسافر برة مصر، ويشتغل في شركة، ويقبض بالدينار أو الدولار... وبعد 10 سنين، ييجي، يجيب الهامر، ويتجوز الموزة، ويعيشوا في تبات وفيلات، ويخلفوا صبيان وبنات... هاه... بينطبق عليه أوصاف الحلم...؟ أحلام مادية بردو على خلفية مهنية... لكن، إيه الجديد؟ ملايين الناس بتسافر برة، وبتشتغل، وبتجيب فلوس كتير، وبترجع بفرق العملة تعيش عيشة الملوك... الطبيعي أصلاً، إن البلاد اللي بنسافرلها، بتدفع فلوس كتير نسبياً للعاملين فيها... ومش شيء جديد، أو غير عادي، إننا نحوش قرشين حلوين هناك... ونرجع بيهم مصر قيمتهم مضاعفة عشر مرات ع الأقل...! دة بردو بصنفه برة دايرة الأحلام، على إنه من "العاديّات"...

طيب... واحد بيحلم إنه يسافر برة مصر، ويشتغل في شركة، ويقبض بالدينار أو الدولار بردو... بس جنب دة، بيطور ذاته، بيدرس، بيتدرج في المناصب، بيشارك في إنتاج علم أو تكنولوجيا جديدة، بقى ترس في آلة إنتاج حقيقية... حقق ذاته... بس مش هيرجع مصر بعد 10 سنين، ولا 20 سنة، ولا هيرجع خالص... لإنه لو رجع، هيبقى قطع الطريق اللي بدأه... وموصلش لمنتهى حلمه... هيجيب الهامر وهيتجوز الموزة وهيعيش في الفيلا، بس هناك... لأنه مرتبط لسة بمشوار حياته المهني... الناجح... حلم جميل جداً... وبصنفه من ضمن دايرة الأحلام... لأنه قدر يحقق حاجة مش عادية فعلاً... بس... هي "مش عادية" بس "مش أوي"... لأن الظروف والجو برة، بيساعد، ويشجع... وكتير من المصريين، سافروا برة مصر وحققوا ذاتهم... على المستوى العلمي (الأكاديمي)، على المستوى المهني (التكنولوجي)، على المستوى الفكري، الخ... الخ... والنماذج تشهد... في بلاد هي ناجحة أصلاً...

لكن... في بلد... لا بتشجع... ولا بتساعد... والظروف فيها صعبة... والموارد فيها محدودة... ومفقود الأمل في إصلاحها... وييجي شاب... يحاول... يبني... ويتعلم... ويحقق ذاته... ويجيب الهامر... ويتجوز الموزة... ويعيش في فيلا... ويرسم نقطة بيضا، مكان نقطة سودا... دي أكتر حاجة مش عادية... أكتر من اللي سافر جاب فلوس ورجع... وأكتر من اللي هاجر، وبقى حاجة كبيرة، برة... لأنه تحدى الظروف، تحدى التعليم السيء، تحدى الفكر الرديء، تحدى التقاليد البالية، تحدى الأحوال المادية، تحدى حتى كل اللي بيحبطوه... ونجح... في بلده... في بلد مفقود الأمل فيها للأسف... اسمها مصر...!

دة أعظم حلم، ممكن يتحقق... دة أعظم نجاح... وأسمى هدف... وأصعب غاية...! دة حلم لما يتحقق، بنوصل لأقصى درجات النشوى، والإحساس بالذات... عمري ما فهمت الإصلاح، على إننا نجيب مسئولين كويسين، يصلحونا... أنا بفهم الإصلاح، على إن صفحة سودا، نملاها نقط بيضا...! وهو الإصلاح الاقتصادي إيه أكتر من إن البلد تبقى مليانة مشاريع ناجحة وبتدفع رواتب كويسة للعاملين فيها...؟ إن البلد تبقى منتجة مش مستهلكة...؟ وهو الإصلاح السياسي إيه أكتر من إن اللي عايشين في البلد، فكرهم يبقى أرقى، وعندهم وعي أكتر...؟ إن الشعب يكون مثقف، وبيفهم، عشان يقدر يختار مصيره...؟ وهو الإصلاح التعليمي محتاج إيه أكتر من إن الـ "ستافف" الشباب، يبقى عندهم حلم، ويحققوه...؟ إنهم يعوضوا النقص في التعليم والإمكانيات، بالمجهودات الفردية...؟

وهو اللي عمل البلاد المتقدمة إيه أكتر من... حلم... وشباب...؟؟؟

فوضى اللغة - من أجمل ما قرأت

2010-08-25T06:08:00.003+02:00

جزء من كتاب: ثقوب في الضمير. للدكتور أحمد عكاشة...

"تعتبر اللغة أحد الأسس التي تبلور الشخصية الوطنية. إن فوضى اللغة التي نعيشها في مصر الآن، جعلت الشخصية المصرية تتأثر سلبياً في عملية التعبير عن الفكر. فاللغة لها تأثيرها على سمات الشخصية، ويتضح ذلك في مشاهد اللغة في الفيلم الأمريكي والتي تختلف تماماً عن اللغة في الفيلم البريطاني، وعنها في الفيلم الفرنسي أو الياباني. وإذا نظرنا إلى اللغة في أفلامنا العربية واستبعدنا عامل اللهجات المختلفة تبين لنا تفرد اللغة التي تستعملها الشخصية المصرية بألفاظ وجمل تحتاج لدراسة نفسية عميقة، ويحتمل أن تكون بداية هذه اللغة الفريدة مع مسرحية مدرسة المشاغبين وتأثيرها على الأجيال المختلفة، فكثير من الشخصيات المصرية تستعمل لغة تعكس الاستهتار والتسيب الاجتماعي والانفلات النفسي وعدم تحمل المسئولية والسخرية من القدوة والرمز والقيم.

تعتمد المنظومة الفكرية والقدرة على الابتكار والتحديث وحاسة الإبداع والخلق، بل والتذوق الجمالي والثقافي على تواصل وتوحد اللغة. إن ثبات وصدق اللغة هما بعض من الأسس الهامة للثقافة الحية والتقدم العلمي. فلا يمكن أن يكون للمنزل لغة وللشارع لغة أخرى وللأغني لغة ثالثة ثم للجرائد لغة رابعة، وللقرآن لغة خامسة. لأن هذه الفوضى تسبب تشتتاً في الفكر، وضحالة في الثقافة، وانهياراً في التذوق الأدبي والجمالي.

وإذا لاحظنا ما حدث في مصر في العشرين سنة الأخيرة من الفوضى في لغتنا العربية لوجدنا أن الطبقات الميسرة تزج بأبنائها في المدارس الأمريكية والفرنسية والبريطانية والألمانية، فيتكلمون هذه اللغات أفضل من العربية، ويصبح الطفل في تشتت فكري يجعله ينجح في الامتحانات لكنه غير قادر على الابتكار. وحتى في المدارس المصرية نجد أن مستوى تدريس اللغة العربية تدنى بشكل ملحوظ، حتى أن خريج الثانوية العامة غير قادر على استخدام لغة عربية صحيحة. بل إن صانعي القرار أنفسهم والمسئولين وأجهزة الإعلام أصبحوا يتكلمون لغة ليست بالعربية أو حتى العامية، ولكنها خليط من عدة لغات دخيلة إحداها على الأخرى.

وإذا نظرنا إلى الأفلام والأغاني التي يعشقها الكثيرون فسوف نجد بها إسفافاً شديداً في اللغة، ونحن نعلم أن الشباب والشابات عادة ما يتوحدون مع أبطال الإعلام من سينما وتليفزيون أو نجوم الأدب والفن، والسؤال المطروح هو: ما هو المثال الذي يجدونه للتوحد معه؟

ولا نجد في الجامعات اسثناءً لذلك، وسأعطي مثلاً بدراسة الطب والتي تتم حتى الآن باللغة الإنجليزية. وحيث ينص ميثاق ممارسة مهنة الطب على ضرورة أن يفهم المريض اللغة التي يتكلم بها الطبيب. فالطبيب والمريض الألمانيان يتكلمان الألمانية والطبيب والمريض السويديان يتكلمان السويدية والطبيب والمريض الأسبانيان يتكلمان الأسبانية ولكننا في مصر والبلدان العربية المستعمرة سابقاً نجد أن المريض يتكلم لغة والطبيب يتكلم لغة أخرى لا يفهمها المريض، وهو الأمر الذي يمكن اعتباره لا أخلاقياً حيث إنه يتجاوز حق المريض في الفهم الدقيق لحالته وما يقرر بشأن صحته. أضف إلى ذلك أن اللغة الإنجليزية التي يستخدمها الطبيب عادة ما تكون لغة ركيكة علمياً ومن ثم فأنه يصبح فاقداً لكل من اللغة العربية والإنجليزية.

عادةً ما يكون الإبداع والفكر باللغة الأم ولذا نجد أن الإبداع بين العلماء في مصر محدود إلا إذا ما تواجدوا في بيئة تتوحد فيها اللغة، حيث يبرز عندها النبوغ والعبقرية المصرية. وجدير بالذكر أنه مع بدايات تدريس علوم الطب في مصر في القرن التاسع عشر أصر الفرنسيون على ان يكون تعليم الطب في مصر باللغة العربية واستمر الحال كذلك، حتى جاء الاستعمار البريطاني واستغنى عن الأساتذة المصريين واستبدلهم بالأساتذة الإنجليز واستمر التدريس باللغة الإنجليزية من وقتها وحتى اليوم.

لقد أثرت فوضى اللغة في قدرتنا على التذوق الجمالي وأصبحنا لا نميز الشيء القبيح من الجميل، بل وأصبح التذوق الجمالي مقصوراً على فئة خاصة ختى لا تشترك فيه فئات الشعب المختلفة. إن دور الإعلام في هذا المجال هو الارتفاع بالتذوق الجمالي والثقافي للشعب، والتركيز على نوعية المادة القدمة وليس على كميتها. ولذلك فمن الافضل لهذا الشعب أن يستمر الإرسال التلفزيوني لعدة ساعات مكثفة تتميز بالمستوى العالي في الأداء والمضمون بدلاً من أن يستمر البث طوال الليل والنهار بغض النظر عن المضمون، إضافةً إلى ما يترتب على ذلك من تقليل من ساعات النوم وضعف الأداء في مجال العمل.

إن نهضة الأمة المصرية والعربية تعتمد إلى حد كبير على الاهتمام بقدرتنا على التواصل بلغة موحدة ومحاربة فوضى اللغة وتمكين كل فئات الشعب من التذوق الثقافي والجمالي وتجنب انغماسها في طرب وتسلية لا طائل من ورائهما سوى نسيان معاناتها اليومية بدلاً من العمل على مواجهتها.

وإذا ركزنا على الجانب الثقافي باعتبار أن اللغة هي أبرز ملامحه وأدواته، نجد أن الهيمنة الثقافية تعد نتاجاً مقصوداً أو غير مقصود لظاهرة العولمة، فلا شك أن أذرعة العولمة الطويلة المتمثلة في الشركات المتعددة أو المتعددة الجنسيات وشبكات الإعلام العملاقة أو الأخطبوطية، وما يصاحب مواكبة العولمة من أنماط السلوك والممارسات، يمثل اختراقاً صارخاً لخصوصيات الشعوب وثقافاتها، الأمر الذي ينذر بالتهديد لهويات هذه الشعوب، ولا شك أن الشأن الثقافي لكل أمة هو الذي يحدد بقوة ملامح هويتها، وعندما نتكلم الآن عن الثقافة فإنما نتكلم عنها بمنظورها الواسع المستمد من عقيدة الأمة ولغتها وتراثها المشترك.

وتعد اللغة من أهم الملامح التي تكون هوية الأمة وتميزها عن غيرها من الامم، فاللغة والدين هما العنصران المركزيان لأي ثقافة أو حضارة، كما يؤكد ذلك هنتنجتون في كتابه "صدام الحضارات" ومن هنا فإن أي تحد لثقافة ما ينطوي على تحد للغتها، فهل تواجه العربية تحدياً من هذا النوع في عصر العولمة؟

إن لغة تعد أجنبية لدى 92% من سكان الأرض لا يمكن أن تكون لغة عالمية. إن لغة الاتصال العالمية بين مختلف الثقافات والحضارات، هي لغة تبادل المنافع بين أبناء التجمعات الثقافية المختلفة فيما بينهم، وهم لا يتكلمون بها داخل التجمعات التي يستعملون فيها لغاتهم الخاصة.

إن الشعور المبالغ فيه بأهمية اللغة الإنجليزية ينتج غالباً من الانبهار بكل ما هو أجنبي. وغني عن الذكر أن هذا الشعور ينبع من الإحساس بالهزيمة النفسية التي يعاني منها الإنسان العربي في هذا العصر، والإعجاب المتنامي بصانع الحضارة المعاصرة الذي يمثل المنتصر والغالب. وقد تحدث ابن خلدون عن مثل تلك الحالة التي يعجب فيها المغلوب بالغالب فيتشبه به ((في شعاره وزيه ونحلته وسائر أحواله وعوائده)).

لقد أثبت عدد من الدراسات العلمية التي شملت نماذج دول العالم المختلفة ان استعمال اللغة الأم وبخاصة في المراحل الأولى من التعليم أولى من استعمال اللغة الأجنبية، ليس من باب التعصب القومي أو الشعور العاطفي نحو الذات، وليس من باب رفع الشعارات، ولكن استناداً إلى حقائق موضوعية علمية تشير إلى الآثار طويلة المدى التي يسببها تعليم اللغة الاجنية للصغار على انتماءاتهم الوطنية، فيكرس في نفوسهم الغصة التبعية للأجنبي.

إن هذه النماذج جميعاً بلا استثناء لا تعلم اللغة الأجنبية في المرحلة الأولى من التعليم كما انها لا تدرس العلوم بتاتاً بلغة أجنبية في أي مرحلة من مراحل التعليم.

التحدي الإعلامي، والتحدي اللغوي المتمثل في الازدواجية اللغوية بين العامية والفصحى، والتحدي العلمي والتقني هي كلها هموم طويلة المدى وعلى جانب شديد من التعقيد.. لكنها جميعاً تتصل بالتخطيط التربوي والعملي الذي لا بد من انتهاجه من أجل صياغة مشروع جديد للنهوض الحضاري.

إن ما ذكرته من الحديث عن اللغة الاجنية لا يعني عدم فائدتها أو أهميتها ثقافياً وعلمياً ولا يعني الدعوة إلى الانعزال والتقوقع والاكتفاء بالعربية دون الإطلال إلى ما عند الآخرين، وإنما يعني توظيف هذه اللغة الاجنبية بما يناسب حجم المجتمع والأفراد وإعطاءها الحجم المناسب لها بوصفها لغة أجنبية لا يحق لها أن تقصي العربية عن موقعها، ولا أن تجوز عليها على ألسنة أهلها او مجتمعهم.

وقبل أن أختم هذا الحديث أود أن أزف إليكم خبراً سمعته من أحد الزملاء المشتغلين بدراسات الحاسب الآلي والمعلوماتية مفاده أن دراسة أجريت في اليابان على اللغات العالمية تستهدف معرفة أكثر اللغات وضوحاً صوتياً في استخدامات الحاسب الآلي، وأثبتت هذه الدراسة أن اللغة العربية تتصدر هذه اللغات في هذه الناحية بينما تأتي اللغة الصينية في آخر القائمة بما يؤكد تميز اللغة العربية من ناحية الوضوح الصوتي."

الرأس مال

2010-08-24T21:26:00.006+02:00

ساعات بفكر في حالنا كشباب في البلد دي... الشاب المصري، مش لاقي تعليم كويس، مش لاقي وظيفة كويسة، مش لاقي فلوس يتجوز، مش لاقي فلوس يركب عربية ترحمه من ذل المواصلات، مش لاقي هدف ولا معنى من حياته...

كتير بقرأ وبسمع كلام الشباب... أنا كرهت البلد دي، أنا عايز أهاجر، التعليم فاشل، البطالة وصلت لأقصى معدلاتها، الفساد بقى عامل زي السوس، أصلهم بينهبوا، أصلهم بيسرقوا، أصلهم خصخصوها وباعوا البلد، أصلنا بقينا في الحضيض خلاص، أصلنا أصلنا وفصلنا...

كتير بشوف قصص... حبيتها واتخطبت... حبيتها وسابتني... حبيتها وأبوها رفضني... حبيتها وأمها عايزالها ابن صاحبتها... أصلها بلد محبطة، أصل الجواز قدامه تعقيدات كتير، أصل سعر الشقة دلوقتي بكام، أصل الدهب وصل تمنه لكام، أصل أصل وفصل...

أنا عندي تحليل بسيط للمشاكل دي، ومش بقول إني بقدم الحل... لكن...

النظام الاقتصادي في مصر هو رأس مالي بحت، حتى لو الدستور بيقول غير كدة... بس المشكلة إنه اتحول للرأس مال بالتدريج واحدة واحدة، من غير ما حد يشعر أوي، ومن غير ما نتهيء لثقافة الرأس مال... بمعنى...

اللي معاه يدفع... واللي ممعهوش، ميلزموش... نظام متوحش، بس أمر واقع في الدنيا...

أيام آباءنا، كان النظام الاقتصادي اشتراكي... وإن كان حتى على حد آراء بعض الخبراء اللي سمعتهم بيقولوا مكنتش مطبقة صح... بغض النظر، أهالينا لقوا تعليم كويس، ببلاش... لقوا وظائف حكومية بمرتبات كويسة في وقتها... لقوا شقق كويسة بأسعار رخيصة سواء للتمليك أو للإيجار... لقوا بساطة في متطلبات الزواج... كان فيه بساطة في الحياة عن كدة...

بس يا ترى، هل أهالينا ربونا على الرأس مال ولا الاشتراكية؟ بمعنى... بابا قالي، يا بني لما هتدخل الجامعة هتتعلم؟ ولا معلش يا بني ممعيش فلوس أدخلك جامعة خاصة محترمة فيها تعليم محترم يليق بيك؟ بابا قالي، يا بني ذاكر وابقى شاطر وهات تقدير عشان تتخرج وتنجح وتلاقي وظيفة؟ ولا قالي يا بني اشتري كتب واقرا واتعلم واتثقف واختارلك مجال تطور قدراتك فيه، واشتغل في الأجازات واكتسب خبرة، عشان لما تتخرج تكون مؤهل لإنك تلاقي وظيفة في القطاع الخاص؟ دة إن مكنش أحياناً بيعتبروا الحاجات دي مضيعة للوقت...! بابا قالي، يا بني عايزين نفرح بيك كدة قبل ما أموت ونخطبلك؟ ولا يا بني صاحب وعيش حياتك، بس متفكرش تتجوز وتعمل أسرة غير لما تحقق ذاتك الأول؟ بابا قالي، احنا يا بني في زمان التعليم فيه مجاني والوظائف فيه حكومي؟ ولا قالي يا بني افهم الدنيا واعرف اننا في عصر الرأس مال، كل حاجة فيه بفلوس، والأحسن بياخد أكتر، والأسوء بياخد الفقر والحديدة؟

ليه بننتظر تعليم كويس مقابل 100 جنيه في السنة...! وكورس كويس مقابل 300 جنيه...! ووظيفة حكومي مقابل 600 جنيه...! وشقة كويسة مقابل 10 آلاف جنيه...!

ليه عايز تشتغل بـ 5000، وإنت مدفعتش عمرك مليم في كتاب، ومعندكش حتى مكتبة كتب في أوضتك، وقضيت حياتك بس في تضييع الوقت...! ليه عايز تتجوز بدري، وكمان في شقة تمليك، وكمان تجيب شبكة، وكمان تعمل فرح، وكمان تعمل نيش...! ليه عايز تلاقي كل حاجة متوفرة من فوق، من عند الحكومة، واللوم كله على فوق، على الحكومة، والواقع بيقول إن الكورة في ملعب القطاع الخاص... هو اللي بيغلي وبيرخص، هو اللي بيوظف وبيرفد، هو اللي بيتحكم في حياتك، يرفعها، أو ينزلها...!

مش منطقي إنك تعترض على إن إيجار الشقة بـ 1000 جنيه، وإنت نفسك لو عندك شقة هتدور على إيجار ليها بالشكل دة... مش منطقي إنك تعترض على إن المهندس حديث التخرج بياخد 1000 جنيه، وإنت نفسك لو عندك شركة هتستكرها على اللي بيجيلك... مش منطقي إنك معترض على الشبكة والمهر، وتطلبهم من عريس أختك لما يجيلها...

المشكلة فينا إحنا... إحنا القطاع الخاص، وإحنا المجتمع اللي خلق أوضاعه... دش مش بينفي مشاكل الحكومة، بس مشاكل الحكومة مش هي العائق اللي في حياتنا في مصر...

اعترف، إن التعليم اللي اتعلمته تستحقه مقابل اللي دفعته...
اعترف، إن الوظيفة اللي لقيتها تستحقها مقابل اللي اتعملته...
اعترف، إن أهلي وأهلك هم اللي مصعبين الجواز...
اعترف، إن الفقر اللي بنعيشه، عايشينه بسبب الفكر الاشتراكي لأهلي وأهلك...
اعترف، إن الناس اللي عايشة في مستوى تاني غير اللي احنا عايشين فيه، مسرقوش، بس لعبوها صح...!

واجه الواقع... إحنا ينعيش في عصر الرأس مالية...!!

المستثمر، والمليونير، والمهندس...!

2010-08-24T20:04:00.003+02:00

الموضوع اللي عايز أتكلم فيه بسيط... إنت دلوقتي راجل مهندس، عايز تبقى مليونير... طب إزاي؟

إنت دلوقتي مستثمر وعايز تبقى مليونير، أو مليونير وعايز تبقى مستثمر، في مجال هندسي، وإنت أصلاً مش مهندس... طب إزاي؟

الحل بسيط... المستثمر أو المليونير هيعمل مشروع، هيستعين فيه بالمهندسين مقابل فلوس... المهندسين هيروحوا يشتغلوا في المشروع دة، مقابل فلوس... طيب...

صاحب المشروع هنا سواء مليونير أو مستثمر عايز يبقى مليونير (يحقق أرباح كتير)، كل تفكيره في إنه يعمل فلوس أكتر بموارد أقل... وهو طبعاً مش فاهم شغل المهندس... في حين إن المهندس عارف كدة وكدة هو هياخد كام في آخر الشهر، بس بيحاول يحقق ذاته أو حتى بيحاول بس إنه يعمل الصح علمياً في الشغل... مهما تكلف الموضوع من موارد... طيب...

هنا بينشأ صدام... صدام مألوف لأي مهندس أو صاحب مشروع مر بنفس التجربة... ممكن صاحب المشروع يقتنع بالمهندس... وممكن ميقتنعش... ممكن يقتنع، ومينجحش رأي المهندس... وممكن ميقتنعش ومينجحش رأي صاحب المشروع... وممكن يكون أصلاً رأي المهندس صح، بس المستثمرمصبرش لحد ما الفكرة تاخد وقتها الكافي... وممكن ... وممكن...

في كل الأحوال، الإدارة هنا اتقسمت بين اتنين... واحد معاه فلوس، وواحد معاه علم... بس طبعاً هيكلياً صاحب المصلحة واللي معاه مفتاح الخزنة، هو المسيطر... والمشروع كله متوقف على انفتاح مخه... وكدة وكدة، مهما قبض منه المهندس، عمره ما هيبقى مليونير... ممكن بكتيره، يبقى مليونير أحادي... يعني يشتغل عمره كله عشان يعمله مليون ولا اتنين... زي أي واحد مش مهندس ممكن يسافر برة ويعملهم وييجي... طيب...

محدش هيصرف على ابنه ويفهمه أكتر من أبوه... زي أحمد عز مثلاً، بغض النظر عن أي أمور سياسية، منقدرش ننكر إنه عمل مشروع ناجح جداًعلى المستوى المهني... بس دة ليه؟ لأن المستثمر هو نفسه المهندس... بردو مثلاً فيلم Inception... المنتج (المستثمر) هو نفسه الكاتب هو نفسه المخرج...

اتفرج بقى على شركات الآي تي اللي في المنصورة مثلاً... مهزلة... كل يوم إسم جديد يفتح وإسم جديد يقفل... كل يوم مستثمر يستثمر فلوسه في أفكار مفلسة، ويفلس... والواحد من دول فاكر إن الاستثمار في الهندسة فلوس، ميعرفش إن الاستثمار في الهندسة، هندسة...!

أنا مؤمن بإن الـ cast لما يكون شخص واحد، عقل واحد، روح واحدة، بيحقق أقصى نجاح... ودة سر إعجابي الشديد بمايكل جاكسون مثلاً... كان بيكتب الأغنية، ويلحنها، ويعمل فكرة الكليب، ويكتبها، ويصمم رقصاتها واستعراضاتها وديكوراتها... وبعدين يصرف عليها وينتجها... وينتج في النهاية عمل، يحقق المركز الأول عالمياً...!

أنا مؤمن بإن الـ business الهندسي لازم يكون المالك ليه مهندس... مش مهم يكون غني، مش مهم يكون رأس ماله كبير... لأن أصلاً الهندسة، هي اللي بنت رءوس الأموال الموجودة مع أغلب مليونيرات العالم...!

أنا مؤمن بإن المهندس لو عايز يكون مليونير في يوم من الأيام، ودة كان هدفه... ميضيعش وقت كتير مع شركات وشراكات مع مستثمرين، لازم يبدأ في يوم من الأيام مشروعه الخاص...!

أنا مؤمن بإن العلم يكيل بالبتنجان... إيه فايدة العلم والتعلم والتعليم لو مش هيجيب فلوس؟ مش مادية ولكن، الفلوس هي المقياس الرقمي لمدى نجاح فكرة، أو مادة علمية، أو تقنية تطبيقية...!

كفاية بقى يا أصحاب رءوس الأموال لعب هندسي بالفلوس، أو لعب إفلاسي بالهندسة... خلاص أثبتولنا إن ملكمش فيها...!

دة وقتنا يا مهندسين إننا نكون المستثمرين... عشان نبني business قوي يقدر ينافس إقليمياً وعالمياً... عشان نعمل فلوس نثبت بيها إن المهندس، مش إنسان كحيان بيجري ورا أكل عيشه... وإن الغني، مش بس هو السباك متوسط المؤهل...!

رقصة الإبداع - خاطرة

2010-08-24T19:52:00.003+02:00

دقات الطبول ذكرتني...

برقصة رقصتها سريعة الإيقاع...

على أرض المنطلق بدأتها...

بخطوات من الفن والإبداع...

بتلك اليدان وروح عاشق أديتها...

وعشت أنغامها حتى النخاع...

اليوم، تلك اليدان إلى السماء...

تلك الأصابع مفرودة، بلهفة الملتاع...

تكاد تمس مصابيح الدنيا...

ولكن، مبتغاها أعلى بأميال وأذراع...

تلك الكفان انقبضا، قهرا...

وعروقهما تنبض، بإصرار فزاع...

انخفضا، بحرقة، دقا رمال الوطن...

انغرسا، انجرحا، لصورة عمر ضاع...

الدم الساخن ينزف، يصرخ، والصدى...

"متى أكمل رقصتي، بحرية، واستمتاع"...!

28-6-2010

ظننته المنبة...! - قصة قصيرة

2010-05-06T13:10:00.002+03:00

صحوت على اهتزاز هاتفي المحمول تحت وسادتي.. مددت يدي لأتناوله في تكاسل... نظرت في شاشته بروتينية، ظننته المنبه... فوجئت! خفق قلبي بشدة... انسحب روحي بقوة... اهتزت يدي وأنا أشعر ببالغ السعادة التي كنت أشعر بها دائماً عند رؤيتي لذلك الرقم المميز، المصاحب باسم التدليل الجميل المحبب إلى قلبي... يالله! إنها هي! هل رق قلبها أخيراً لمحاولاتي اليائسة استرضاءها، ونعود كما كنا دوماً، حبيبن عاشقين؟ ضغط الزر الرد الأخضر كعيناها، وفي قلبي كل لهفة الدنيا.

- حبيبتي؟

- حبيبي... أوحشتني كثيراً...

لم أصدق نفسي في البداية، وظللتني لازلت نائماً.

- حقاً؟!

- نعم يا حبيبي... لم أقدر على فراقك أكثر من ذلك...

خفق قلبي كثيراً بين ضلوعي، إثر سماع تلك العبارات بصوتها العذب الجميل... الذي لطالما سهرت ساعات طويلة، طيلة أكثر من عامين، أستمتع بشدوه في أذني... رباه! هل استجابت لتوسلاتي أن تسمعني وتسامحني وننسى ما مضى؟ وما الذي مضى سوى أعام من الحب انتهت بمشكلة صغيرةً كانت أو كبيرة، يمكن أن يتجاوزها حبيبن تحابا كما لم يتحاب بشراً من قبل؟ يا الله! كم أحبك! كم أشتاق إليك! شهر كامل طويل وكئيب مر منذ ان افترقنا، أحسست خلاله بأني كالجثة بلا روح...

انتفضت من فراشي واقفاً، بدلت ملابسي على عجل... طرت إليها، وروحي تسابقني وهي تهفو لها... وكيف لا... وأنا طيلة ذلك الشهر أتجنب العذاب بمجرد التفكير فيها... فلا أفكر إلا في سواها فأغرق في أمواج العذاب... أفكر في عينيها الملونتين الجميلتين... في شفتاها الورديتين الرائعتين... في رقة طلعتها... في هالة قربها المفعمة بالأنوثة الساحرة... التي لطالما عشقتها، وأسكرتني...

كنت واثق أننا سنعود، ودائم النفي لذلك في قراره نفسي بذات الوقت... هذا الملاك البشري لطالما تخيلته لي وحدي... ملكي... نعم، إنه لي... افترقنا؟ مستحيل! لا يمكن أن تكون لغيري... عذاب الشوق والغيرة المكتومين بداخلي دائماً يؤلمني طيلة هذا الوقت... يا الله! الآن، سنعود من جديد! سنشعل سوياً نار العشق من تحت رماد الافتراق! من جديد!

أكاد أكون نسيت ما حدث، ونسيت نفسي ولا أفكر في أي شيء سواها... أفكر فقط في تلك الأيام التي ستعود من جديد... استمتع بقربها مني، ولقاها... رحت أسابق قدمي في لهفة، حتى ألقاها...

التقينا... وقفت مبهوتاً أتأملها... كعادتها كانت، قطعة من البلور الأخاذ... كعادتها كانت، عيناها الخضراوتان تلمعان ببريق التيه المسكر... كعادتها كانت، جميلة الجميلات... انسحبت مني روحي... وطارت تحلق في هواها... نسيت نفسي ونسيت الدنيا من حولي... اقتربت منها ببطء، وحب جارف... احتضنتها... أحسست بجسدها الصغير يلمس ضلوعي... كم أحبك! تلمست ظهرها الجميل بأصابعي، وضممتها.... كم أحبك! داعبتها بخفقات قلبي الأسير بها، وخدي يفترش خدها... كم أحبك! تحسست شعرها الناعم الأثير بين أصابعي... كم أحبك يا ملاكي! كم افتقدتك يا محبوبتي! أوحشتيني كما لم توحش حبيبة حبيبها أبداً... كم أحسست بأني لا شيء، بدونك... وأن الكون غير موجود، بدونك... وكم كنت وحيداً، بلا هدف، بدونك... كم مرت الليالي بطيئة، ثقيلة، في بعادك... كم احتجت لأن أكلمك فتسمعيني، فلم أجدك... كم احتجت لأن أذرف دموعا تمسحها أصابعك، فلم أجدك... كم اشتقت لأن أهمس بمشاعري الفياضة في أذنك الجميلة، فلم أجدك يا حبيبتي!

- أحبك... "هامساً في أذنها"

- لم أقو على الحياة، دونك... "هامساً في أذنها"

- أسأت فهمي... قد كنت أيضاً مجروح... "ناظراً في عينيها"

- كنت أحتاج لعذوبتك... لرقتك... لأني كنت، ولا زلت، تعبان... "ذارفاً دمعة حارة من عيني"

- لم تكوني مكاني، ولم تحسي مثلي بجفاء واهم منك... فلم تفهمي لم فعلت ذلك... "والدمعة تسقط من خدي على ثوبها"

- لذلك، اسأت التقدير والتصرف... فهجرتيني ولم تسامحيني أو تسمعيني... "متألماً"

- أعرف إني جرحتك... وأعرف أيضاً أنني لا أستطيع الحياة بدونك... وأعرف أني لن أجرحك مجدداً، ولن أدعك تضيعي مني أبداً... "بحب منفعلاً"

- لقد جرحتني... "نظرة اللوم في عينيها"

- ولم تقدر كل ما أفعله من أجلك... "ذارفة دمعة حارة من عينيها"

- لم تكن مكاني، ولم تحس مثلي بجفاء وإهمال منك..."والدمعة تسقط من خدها على ثوبي"

- فلم تفهمني لماذا ابتعدت... لماذا لم أسامحك... "متألمةً"

- ولكني لم أتحمل فراقنا... فسامحتك... "بحب منفعلةً".

- اشتقت إليك كثيراً يا ملاكي... "أضمها بيدي إلى أكثر"

- اشتقت إليك كثيراً يا حبيبي... "تتعلق في عنقي"

- لن أتركك أبدا يا حبيبتي... "أتناول كفها الرقيق بيدي"

- ولكني لازلت كما أنا... قلقة من الغد...

- وعدتك أن أكون أقوى من نفسي ومن الأيام، فلا تقلقي...

- ولكنها طويلة تلك الأيام...

- إنها طويلة تلك الأيام...

- الظروف قد تكون أقوى مني...

- تحمليها من أجلي...

- ماذا كنت تشعر بدوني؟

- لا يمكن لبشر، أن يتخيل شعور العاشق، بعيداً عن حبيبته... يشتاق إليها ويتمناها... ويظن أنها لم تعد له... ألم الفراق عذبني كثيراً... ذكرياتنا الحلوة سوياً آلمتني كثيراً... أفكار أن يتملكك غيري قتلتني! أن أكون ذائباً بعشقك.. وعشق كل ما فيكي... ويأتي غيري فيهمس بأذنك بذات الكلمات... ويلمس شعرك بذات الشغف... ويتناول يديكي بذات الحب... أهون عليا الموت... على أن أعيش لحظة وأعرف أن هذا قد حدث...

- أنا لك يا حبيبي... ولن أكون لغيرك...

- أنا أحبك...

- كثيراً؟

- بل بجنون...

- إذاً... هيا قم بتبديل ملابسك العسكرية... وادعوني للعشاء!

- ملابسي العسكرية؟ ظننته المنبه!

صحوت على اهتزاز هاتفي المحمول تحت وسادتي.. مددت يدي لأتناوله في تكاسل... نظرت في شاشته بروتينية... أوقفت رنينه المزعج... ودمعة حارة تسقط على خدي، تبلل الوسادة العسكرية من تحت رأسي!

6/5/2010 01:10 م

حلم السعادة

2010-01-06T08:16:00.004+02:00

"مفيش إنسان في الدنيا سعيد"...

مع احترامي للرأي دة، الكلام دة مش حقيقي، وما هو إلا مجرد رأي لتخفيف من الإنسان على نفسه شعوره بعدم السعادة... والجملة دي تحديداً أعتقد على حسب ما بشوف وبسمع وبقرأ في الإعلام مش ظاهرة غير في لسان حالنا وقولنا إحنا المصريين... برغم إن فيه دول كتير عربية شقيقة وغير عربية، جارة وبعيدة، منهم ناس كتيرة بتعبر علناً عن سعادتهم، وأكيد بالتبعية كتير غيرهم مش بيقولها علناً بس أيضاً سعيد في حياته... منين بقى جت مقولة إن مفيش إنسان في الدنيا سعيد؟

فيه فئة من الناس عندها الثقافة أو الخلفية دي بشكل ديني... من مفهوم إن ربنا قسم للكل نفس المقدار من كل شيء وإن أهم حاجة إن الإنسان يكون راضي... ومع ذلك نفس الشخص دة ممكن في أحيان كتير يكون مش سعيد فعلاً... وظهر معاه المفهوم دة إن مفيش إنسان في الدنيا سعيد من الآية الكريمة اللي بتقول: "لَقَدْ خَلَقْنَا الإِنسَانَ فِي كَبَدٍ" (سورة البلد - آية 4)... ولكن الآية تقصد إن الإنسان دايماً عايش في تعب... أو بنفس الصياغة، مفيش إنسان في الدنيا مرتاح، وليس إن مفيش إنسان في الدنيا سعيد... وفيه فرق كبير بين المعنيين... الإنسان ممكن يبقى سعيد في الدنيا، لكن لو تعب في حياته أكتر عشان يحقق السعادة دي، وهي أمر رباني مباح ومشروع طالما في الحدود التي لا تغضبه... ولو حب الحاجة اللي بيعملها، عشان يحس باللذة بجانب التعب... ويكون عنده الطموح والرغبة في الحياة، عشان يبقى عنده الدافع للنجاح، والقدرة على الفرحة من القلب، وقت ما يحقق نجاحه... إنما مفهوم أن السعادة غير موجودة أو إننا يجب إننا نزهد عنها في الدنيا والأهم هو الآخرة، مفهوم خاطيء ويخالف المعلوم من الدين بالضرورة، من أن الإنسان يجب أن يعمل لدنيته كأنه يعيش أبدا، وإن العمل عبادة، وإن النعمة بتزيد لما بنشكر ربنا عليها، وبيبارك فيها لما بنخرج زكاتها، مهما زادت ومهما كترت، طالما بما يرضي الله...

فيه فئة أخرى من الناس شايفة إن السعادة في بلدنا مصر مستحيلة... وإن صعوبات الحياة اليومية وبعض الأمور والمشاكل المعقدة الموجودة في بلدنا كفيلة بإنها تهدم أي حلم للسعادة... وأبسط مثال إن حتى لو الإنسان سعيد ومبسوط في بيته وشغله، عشان يروح من بيته لشغله هيبقى تعيس في وسط الشوارع الزحمة والمكسرة، والمخالفات، ورؤية أصحاب السلطات والمحسوبية حتى لو محتكش معاهم... فما بالك بالأسعار والمرتبات والبطالة و...و...؟ وجهة نظر... ومع ذلك، فأبواب السعادة دايماً ربنا بيوجدها في أي مكان... وحتى لو فيه كتير حوالينا بيشتكي، مش لازم الإنسان يتخذها قاعدة إن الحياة في مصر مليانة شكوى... الشكوى تؤدي لشكوى وتزيد الهم طالما الإنسان ميقدرش يغير الواقع... والإنسان اللي مستني يغير الواقع من حواليه قبل ما يغير الواقع بتاعه هو هيعيش طول عمره تعيس ومش هيوصل لحاجة... فيه مثل في البيزنس بيقول: "إن في كل مشكلة... فرصة"، وهو منطبق على الحياة في مصر تماماً وفي أي بلد وأي مكان... حتى لو فيه مشاكل حوالين الإنسان، يقدر يتعب، ويوجد من المشاكل دي نفسها الحلول... بس لو الإنسان يغير نفسه، وينتهي من انتقاد الآخرين حتى لو بينتقد ذاته معاهم... وينتهي من سوء الظن في ربنا، وفي البلد، وفي الناس اللي حواليه... يتعب، ويشتغل، ويعيش بما يرضي الله، وإن شاء الله هيلاقي سبيل للسعادة، وثمار لتعبه، واحترام من اللي حواليه، والطريق فاضي لما يروح شغله، أو حتى أغنية بيحبها مع ساندوتش لذيذ وهو نازل شغله أو مشواره نص ساعة بدري عشان يوصل شغله، والدنيا زحمة حواليه... فيه دايماً طريقة حياة أو life style يقدر يعيشها الإنسان عشان يكون سعيد... ولو احتك ببعض المواقف اللي بتضايقه في حياته، من سلطة أو واسطة أو ما شابه، يقدر يتجاوز عنها طالما عنده ثقة في نفسه ويخرج منها ويبعد عنها بذكاء، وينسى الموقف ويكمل حياته بنفس طريقته... إنما اليأس أو الكره للظروف لوحده مش هيؤدي غير للفشل وللحزن المستمر... والبلد هي البلد، مش ظروفها ومش أوضاعها، عمر ما إنسان يلوم بلده لأن بلده في حد ذاتها متقدرش تديله شيء، أو لأن حكومتها مقصره في حقه، أو لأنها لسة متخلفة أو متأخرة... الإنسان يلوم نفسه، لأنه واحد من الشعب، والشعب هو البلد... والفرد هو اللي يقدر يصنع سعادته لنفسه، مش الناس اللي حواليه، ومش حكومته... وبشكل موضوعي في أقصى درجات التشاؤم، بلدنا موصلتش لمرحلة إن اللي بيحقق سعادة بيجيله واحد لابس بدلة ياخدها منه... فعلاً الحياة صعبة عندنا، بس الإنسان اللي بيفكر برة الدايرة وبيتعب، وواثق في ربنا، هيقدر يصنع سعادته بغض النظر هو عايش فين وظروف بلده إيه...

أنا من رأيي، إن سعادة الإنسان ممكن تتحقق، من زاويتين...

الزاوية الأولى، إنه يتعب، ويشتغل، عشان يكون سعيد... الفلوس جزء كبير من السعادة، صحيح مش الجزء الأكبر ولكن الجزء الأهم... والفلوس مش بتيجي بسهولة، لا في مصر، ولا في أي مكان تاني... ممكن تكون النسب متفاوتة، إنما في كل وقت وفي أي مكان، يقدر الإنسان إنه يشتغل ويحقق ذاته... ومع ذلك، مش أي فلوس بتيجي، ممكن تخلي الإنسان سعيد... إنما الفلوس اللي بتيجي من عمل الإنسان بيحبه، ومقتنع بيه، وقبل كل شيء، يرضي ربنا... الفلوس اللي بتيجي من شغل له معنى، وهدف، ومضمون، وبيضيف جديد للنفس، وللمستفيدين من شغلك... الفلوس اللي بتيجي من نجاح بعد نجاح، ومن كتير بعد قليل، ومن تعب بعد تعب... هي دي الأمور اللي ممكن تخلي الإنسان سعيد في حياته من شغله...

الزاوية الثانية، الزاوية الشخصية... إنه يكون في كل مكان مع حد بيحبه... يكون في بيته مع شريك حياته اللي بيحبه واختاره... يكون في شغله في المكان اللي بيحبه واختاره... ولما يخرج، يختار مكان بيحبه ويروحه... مع حد بيحبه... حبيب... صديق... ويستمتع بحياته... بالطول وبالعرض... من غير ما يستكتر السعادة على نفسه... سواء بالإحساس أن مفيس حاجة في الدنيا اسمها سعادة... أو بالتقاعس عن العمل في حياته عشان يكون سعيد...

السؤال اللي ممكن يخطر على بالك؟ هل كاتب الموضوع سعيد؟ الحمد لله أنا سعيد... برغم إني محققتش لسة شيء من أحلامي... وبرغم المصاعب اللي ممكن أكون بقابلها في حياتي زي ما أي إنسان غيري ممكن يقابل مصاعب في حياته... لكن سعيد لأن من حقي أشعر بالسعادة في كل شيء حواليا... حتى لو لمجرد إني أسترجع في خيالي صورة وصوت حد أنا بحبه...

ربنا يدخل السعادة في قلوبنا جميعاً... :)

10 أيام على الرحيل

2010-01-06T06:00:00.001+02:00

السلام عليكم،،،

بقالي فترة مكتبتش في المدونة، دة لأني كنت مشغول طول الفترة اللي فاتت في ترتيب أوراقي ونفسي والتركيز في الأيام الأخيرة من شغلي... قبل ذهابي بإذن الله إلى منطقة تجنيد يوم السبت الموافق 16/1/2010... وبداية فترة جديدة من حياتي تستمر لمدة عام كجندي مجند في القوات المسلحة... وحبيت إني أكتب البوست دة عشان أسجل مشاعري قبل 10 أيام من رحيلي إلى حياتي المؤقتة الجديدة...

مشاعري حالياً في الأيام الأخيرة عادية جداً... زي أي أيام قضيتها في حياتي... مفيش في داخلي أي شيء سلبي ناحية التجنيد... الحمد لله كنت ظابط ونزلت عسكري... والمدة قصرت من 3 سنين لسنة، والبداية اتقدمت بدل ما كانت آخر شهر 4 أصبحت منتصف شهر 1 الحالي... وبالتالي أشكر الله سبحانه وتعالى على تخفيفه المدة علي، واللي كانت المصدر الوحيد لقلقي من التجنيد... لأني -كأي شاب- ليا طموحات وأحلام عايز أحققها في بداية حياتي، ومش عايز أتعطل عنها كتير... أما التجنيد في حد ذاته، فهو فترة جديدة في حياتي أكيد هستفيد منها إن شاء الله... وهي فترة أعتقد إني قضيت فترات أصعب منها في حياتي قبل كدة... وعلى أي حال أنا طول عمري مؤمن بالجيش المصري ومعجب بيه وأحب جداً إني أشارك، بس أتمنى إنه يكون رحيم معايا في الأمور اللي خارجة عن إرادتي... ربنا يقدم اللي فيه الخير وتكون فترة جميلة... وأنا سعيد إنها هتبدأ قريب عشان تخلص قريب بمشيئة الله...

اللي شاغلني حالياً بقى في الأيام الأخيرة... إخواتي وزملائي اللي اشتغلت معاهم وحاولت أعلمهم من العلم المتواضع اللي ربنا علمهوني... بتمنى من ربنا إنه يكون وفقني في إني أفيدهم بأي شيء... وبدعو ربنا من قلبي إنه يسامحني ويجعل أي حد يسامحني لو كنت بدون عمد قصرت معاه أو زعلته في شيء... أنا بجد بحب الشغل دة أوي، وبحب كل اخواتي الكبار والصغيرين اللي اشتغلت معاهم... ومؤمن بيهم... كل واحد أو واحدة فيهم كان بيقدر يثبتلي بشغله وتفكيره واستعداده وتنفيذه قدرته على إنه يكون أحسن... ودة شيء مخليني مبسوط لأني حسيت إن إحنا الشباب المصري، عندنا القدرة والإرادة على إننا نتطور ونتعلم ونكون جيل أحسن... كمان ممتن لكل حد فيهم وجهلي نقد مباشر أو غير مباشر، موضوعي أو هجومي... بجد استفدت من كل كلمة نقد سمعتها في يوم، حتى غير إني أحاول أصلح من نفسي، كنت دايماً بحس بدافع لإني أركز أكتر في شغلي... لو مكنتش بسمع غير استحسان بس، أعتقد كنت ممكن عشت في الوهم وتقاعست عن شغلي أو قل تركيزي فيه وركزت في المظهر على حساب المضمون... الحمد لله، إن ربنا خلاني أشوف نفسي بلسان الناس، ومخلانيش أعيش في وهم الإحساس المفرط بالذات... وهو ألعن وهم ممكن يعيش فيه المهندس من وجهة نظري، وكفيل بإنه ينهيه مهنياً في وقت قصير... ولا يوجد إحساس في الدنيا ألذ من الشعور بالضآلة أمام العلم، والخبرة، والمهنية...

الشيء اللي بتمنى أعمله في شغلي لسة محققتوش... كل شغل عملته حسيت بعديه إن فيه حاجات كتير إضافية كنت لازم أعملها، وإن كان فيه شيء أحسن أنا معملتوش... عشان كدة، عندي حماس وشوق كبير بعد فترة التجنيد بإذن الله، إني أرجع من تاني لشغلي... وأصلح كل شيء غلط عملته... وأضيف كل شيء أتمنيت أضيفه... وأركز فيه أكتر... وأحاول أكمل الرسالة اللي أنا مؤمن بيها وبحبها...

الحمد لله... جندي مجند

2009-12-23T15:55:00.002+02:00

الحمد لله... اللي كان نفسي فيه اتحقق النهاردة، ونزلت بعد الترشيح للقوات المسلحة كظابط احتياط إلى جندي مجند، أو بالعامية يعني عسكري... وبالتالي جيشي يبتدي يوم 16/1/2009 لمدة سنة تقريباً (13 أو 14 شهر)... شعور غريب إن الإنسان يفرح إنه دخل الجيش عسكري، بس مقارنة بالظابط، الواحد يفرح ونص... فرق كبير بين 3 سنين وسنة...

الحمد لله... كتير من زمايلي الأعزاء نزلوا عساكر معايا، ابراهيم درويش وعلي طلبة ومصطفى وحسام غانم... وللأسف ليا زملاء أعزاء بردو دخلوا ظباط... بس إن شاء الله يكون الخير ليهم في ما كتبه الله وتخلص خدمتهم بسرعة، ويبدأوا حياة جديدة ناجحة وسعيدة...

بس أنا طبياً من حقي الإعفاء... إن شاء الله هقدم على التماس عشان أكشف من تاني لعل ربنا يجعل فيه الخير ويديني حقي وآخد إعفاء نهائي من الخدمة... وفي كل الأحوال خير إن شاء الله وتعدي الفترة اللي جاية دي سريعة وعلى خير...

ألف مبروووووك لجميع من نزلوا عساكر.. :-)

إنت بتشتغل إييييه؟

2009-12-22T15:51:00.004+02:00

سؤال مهم بيتسأله كل شاب... هو إنت بتشتغل إيه؟ السؤال دة الحقيقة عملي عقدة شخصية... لأني مببقاش عارف أرد أقول إيه... ولأن كتير من أصحابي وجيراني وقرايبي ميعرفوش لحد النهاردة أنا بشتغل إيه بالظبط...!!

أنا بشتغل Java Instructor... أكيد كل اللي دارسين مجال السوفت ويير أو العاملين بمجال التدريب عارفين بالتحديد معنى المسمى دة... إنما الشريحة اللي مجالاتهم بعيدة عن المجال دة (وهي الأكبر، والأكثر) بتبقى مش عارف تشرحلهم إزاي الكلمتين دول... مين جافا انستركتور دة؟؟ بتاع إيه دة يعني؟؟

عندنا كمبيوتر، أو موبايل... فيهم برامج... فيه ناس بتستخدم البرامج دي... وفيه ناس بتعملها... البرامج دي بتتعمل بأوامر كمبيوتر... بتتكتب بلغات برمجية... فيه لغات برمجية كتير... منهم لغة برمجة اسمها جافا... أنا بقى دوري إني أدير لناس عايزة تشتغل في البرمجة باللغة دي دورات تدريبية تبني قدراتهم فيها للخروج لسوق العمل...

فيه اختصار ظريف بشوفه في بعض الناس لما اشرحلهم مهنتي، وهي إنها مهنة "كورسات"... ودة مش حقيقي... فيه فرق بين الكورسات والبرامج التدريبية... الكورسات في الأصل مصطلح أكاديمي يعني كورس (مادة) في الكلية عليها درجات آخر السنة... أحياناً بيستخدم في وصف البرامج التدريبية، لأنها تقريباً ممكن ينطبق عليها نفس المقاييس وهي إنها تخصص ما بيتم دراسته لفترة معينة وبعد كدة ممكن الطالب ياخد شهادة بدة... إنما البرامج التدريبية ليها فكرة تانية غير الكورسات...

البرامج التدريبية هدفها إن المتدرب يكتسب معلومات وخبرات نظرية وتطبيقية في مجال ما... تؤهله لسوق العمل... وكمان تغير فكره إلى فكر المجال اللي بيتدرب عليه، لأن في الغالب عملية التدريب دي بتكون الخطوة الأخيرة قبل العمل، وغالباً المتدرب بيكون هدفه من الدورة التدريبية "تغيير المهنة" "change career"... إدارة البرامج التدريبية بتتطلب خبرة كبيرة في المجال أو التخصص من المدرب، وبتتطلب مجموعة كبيرة من المهارات اللي لابد إنها تتوفر مع بعض في وقت واحد، منها "مهارات العرض" "Presentation Skills" و"مهارات التواصل" "Communication Skills" ومهارات الإدارة والتعامل اليومي مع متطلبات ومشاكل المتدربين... وبتتطلب علم بـ "أساليب التعلم" "learning methods" و "تصميم الدورات التدريبية" "Training Design"، ومهارات "الكتابة التقنية" "Technical Writing"، بالإضافة لـ "مهارات اللغة" "language skills" من تحدث وكتابه، سواء بالعربية أو الإنجليزية...

لكن يبقى إن ثقافة التدريب تتأصل في المجتمع، عشان أقدر أقول مسمى وظيفتي لأي شريحة من الناس وتفهم إيه دور وظيفتي في الحياة... مش يبقى مجرد تصنيفي أو نظرة الناس للمهنة إنها أشبه بمعيد بيدي دروس أو مدرس ICDL...

واحد هيقولي طب إيه المشكلة؟؟ فيه حاجات كتير تقدر تقولها مش لازم تشرح لكل واحد يعني الكلام دة!! المشكلة في الاستفزازات اللي بتواجها لما بتضطر تجاوب على السؤال دة... يعني خد عندك مثلاً:

الـ عبد لله: سيجارة يا هندسة؟

سواق التاكسي: تسلم يا ذوق... هو حضرتك بتشتغل إيه؟

الـ عبد لله: مدرب كمبيوتر...

سواق التاكسي: والله أنا كنت عايز آخد (كورص) البتاعة اللي اسمها آي دي سي إل دي... ممكن تليفون حضرتك؟

الـ عبد لله وسواق التاكسي: (حوار مستفز عشان يا إما أشرحله إني مليش فيه، يا إما أستنى لحد ما يتلهي في أي مزة ماشية وأخلع من الحوار دة والسلام...

الـ عبد لله: بجنيه شطة يا عم عباس... زي اللي اخدتها من عندك إمبارح...

عم عباس: عينيا يا بيه... اسم الكريم إيه؟

الـ عبد لله: عبد الله...

عم عباس: عاشت الأسامي يا بيه... إلا عدم اللا مؤاخذة حضرتك بتشتغل إيه؟

الـ عبد لله: (طبعاً مش ناسي سواق التاكسي اللي فات) مهندس كمبيوتر...

عم عباس: تصدق يا باشمهندس جهاز ابني الصغير اسماعين بايظ...!!!

الـ عبد لله: يا راجل!!! (وبفكر في إنه يا إما هندخل في حوار مستفز يا إما نفس المزة هتعدي من قدام المحل)...

الـ عبد لله: عمو مرزوق... إزيك يا عمو؟

عمو مرزوق: أهلاً يا عبد الله عاش من شافك... إنت مختفي فين يا بني معنتش بشوفك وإحنا البيت جنب البيت؟

الـ عبد لله: معلش يا عمو أصل الشغل واخدني اليومين دول...

عمو مرزوق: تشتغل فين اليومين دول؟

الـ عبد لله: بشتغل في التدريب... في كذا شركة أنا بشتغل part time...

عمو مرزوق: إن شاء الله تلاقي شغل قريب وتتثبت فيه!!

الـ عبد لله: (ما هو يا إما هفتح حوار مستفز يا إما همشي وهو يا عيني الدمعة بتفر من عينه على حالي)...

أعتقد إن كتير من زمايلي ممكن يكونوا بيعانوا من الموضوع دة... ثقافة التدريب كمجال مهم وكمجال عمل راقي... وثقافة العمل الحر، بلا انتماء لشركة معينة (ثقافة الـ part-time)... غيابها أوقات بيحسسني إني مش قادر أندمج مع المجتمع، محدش عارف أنا بشتغل إيه، أو فين، أو بعمل إيه... نظرة الناس ليك مش ثابتة، فيه ناس فاهماك، وفيه ناس بتبصلك بشفقة، وفيه ناس بتبصلك إنك بلا عمل، وبتدعيلك ربنا يكرمك... يا رب يكرمنا جميعاً، والثقافة دي تنتشر أكثر في المجتمع من حوالينا عشان نقدر نتعايش معاه وظيفياً...

صباح الخير

2009-12-22T14:51:00.005+02:00

صباح الخير... دة أول بوست ليا في البلوج...

النهاردة، صحيت الصبح، معنديش شغل... قدم رجلي كان فيها تمزق بس اتحسن كتير النهاردة... قاعد على المكتب، مشغل أغاني، بشرب سجارة، وبفكر... بكرة يوم إعلان نتيجة كشف الهيئة... واللي فيه على أساسه هيتحدد إذا كنت هدخل الجيش في شهر 4 لمدة 3 سنين (ظابط احتياط) ولا في شهر واحد لمدة سنة واحدة (جندي مجند)... حاولت أتناسى الفترة اللي فاتت القلق من النتيجة دي، واللي على أساسها هيتحدد حاجات كتير في حياتي... أتمنى تكون النتيجة إني عسكري...

بس لما جيت أفكر، أياً كانت النتيجة، فأنا هكون راضي تماماً عن نفسي... لأني لحقت -بفضل الله- أحقق حاجات وأحلام كان نفسي أحققها قبل فترة التجنيد... ولأني فضلت مواصل في طريقي وشغلي لحد آخر يوم... ولأني اتعلمت من كل أخطائي... ولأني قبل كل شيء، ربنا قدرني لأكون صادق مع نفسي... الحمد لله...

بس اللي أنا مش قادر أحدده فعلاً، هل هقدر أدخل امتحانات التمهيدي في الكلية السنة دي وأنا في الجيش، ولا هضطر أؤجل السنة؟ أتمنى إني أقدر أجمع بين الاتنين ويكون ليا الفرصة أذاكر وامتحن أثناء فترة التجنيد، لأنها خطوة مهمة في حياتي...

أياً كانت النتيجة، إن شاء الله أنا مواصل طريقي... وأدعو الله سبحاته وتعالى بالتوفيق لي وكل زملائي...